عالمی یوم مہاجرین کے موقع پر وزیر خارجہ شاہ محمود قریشی نے کہا ہے کہ یہ دن امن  اور تنازعات کے حل کی اہمیت کی سالانہ یاد دہانی ہے جو لاکھوں افراد کو گھروں سے جبری طور پر بے گھر کرنے کی بنیادی وجہ ہے ۔

تفصیلات کے مطابق وزیر خارجہ شاہ محمود قریشی نےاپنے پیغام میں کہا ہے کہ عالمی یوم مہاجرین امن  اور تنازعات کے حل کی اہمیت کی سالانہ یاد دہانی ہے جو لاکھوں افراد کو گھروں سے جبری طور پر بے گھر کرنے کی بنیادی وجہ ہے۔

وزیر خارجہ نے کہا کہ  رواں برس کورونا کے تباہ کن اثرات نے تشدد اور تنازعات کے باعث پہلے ہی بے گھر ہونے والوں کی کمزوریوں کو بڑھا دیا ہے۔

شاہ محمود قریشی نے مزید کہا کہ گذشتہ چالیس سالوں میں پاکستانی عوام نے لاکھوں افغان مہاجرین کی میزبانی میں مثالی فراخدلی  اور ہمدردی کا مظاہرہ کیا ہے ۔

انہوں نے کہا کہ کورونا وائرس کے دوران  ہماری صحت اور دیگر خدمات بغیر کسی امتیاز کے افغان مہاجرین استعمال کر رہے ہیں۔

وزیر خارجہ نے کہا کہ وزیر اعظم عمران خان نے دسمبر 2019 میں جنیوا میں پہلے گلوبل ریفیوجی فورم کا مشترکہ اجلاس کیا۔

شاہ محمود قریشی نے کہا کہ فروری 2020 میں پاکستان نے اسلام آباد میں ایک بین الاقوامی افغان مہاجرین کانفرنس کی میزبانی کی جس کا مقصد تھا کہ ملک میں 40 سالہ افغان مہاجرین کی موجودگی اور ان کے مسائل کا حل تلاش کیا جائے ۔

انہوں نے کہا کہ پاکستان دنیا بھر میں مہاجرین کے لئے یو این ایچ سی آر کے قابل ستائش کام کو قدر کی نگاہ سے دیکھتا ہے۔