گورنر سندھ عمران اسماعیل نے کہا ہے کہ کورونا کے ساتھ جینا سیکھنا ہوگا، اس کے جلد جانے کے آثار نہیں ہیں ۔

تفصیلات کے مطابق گورنرسندھ عمران اسماعیل کی جانب سے سول اسپتال کراچی کے طبی عملہ کے لئے 1500 مکمل حفاظتی لباس ،2000 ماسک اور ھینڈ سینیٹائزر عطیہ کردیا۔

 اس موقع پر گورنر سندھ نے کہا کہ کورونا کے خلاف جنگ میں ڈاکٹرز ، طبی اور صفائی ستھرائی پر مامور عملہ فرنٹ لائن سولجرز ہیں۔

عمران اسماعیل نے یہ بھی کہا کہ فرنٹ لائن سولجرز کی قربانیوں پر انہیں سلیوٹ پیش کرتا ہوں، صحت کے مراکز میں طبی عملہ کو حفاظتی لباس کی فراہمی کے لئے ہر ممکن اقدامات کریں گے۔

گورنر سندھ کا کہنا تھا کہ طبی عملہ کو حفاظتی سامان کی فراہمی ہماری اولین ترجیح ہے، ڈاکٹرز اور طبی عملہ حفاظتی لباس کے ساتھ زیادہ بہتر طریقہ سے کورونا کے مریضوں کی دیکھ بھال کرسکتے ہیں۔

گورنر سندھ کا یہ بھی کہنا تھا کہ ہمارے ملک کے زمینی حقائق ترقی یافتہ ممالک سے کہیں مختلف ہیں ، وزیراعظم عمران خان پہلے دن سے مکمل لاک ڈاﺅن کے خلاف ہیں۔

اپنے بیان میں عمران اسماعیل نے کہا کہ ہمیں کورونا سے بچاﺅ کے اقدامات اور معاشی سرگرمیوں میں اعتدال کا راستہ اپنانا ہوگا۔

گورنر سندھ عمران اسماعیل نے مزید کہا کہ عوام کو احتیاطی تدابیر پر سختی سے عمل کرنا ہوگا، ہاتھ نہ ملانے، گلے نہ ملنے، بار بار ہاتھ دھونے کو اپنے طرز زندگی کا حصہ بنا کرہی ہم کورونا کو پھیلنے سے روک سکتے ہیں۔

ملک میں کورونا سے مزید81 افراد جان کی بازی ہار گئے

یاد رہے کہ دنیا  بھر میں مہلک وائرس کورونا کے وار جاری ہیں ، پاکستان میں آج اب تک 81 افراد جان لیوا وائرس کے باعث انتقال کرگئے جس کے بعد اموات کی مجموعی تعداد 2297 تک جا پہنچی۔

 ملک بھر سے آج کورونا کے مزید 5338 کیسز اور 81 اموات سامنے آئی ہیں جن میں سندھ سے 2487 کیسز اور 42 اموات، پنجاب 2641کیسز 34 اموات، اسلام آباد 178 کیسز 5 اموات اور آزاد کشمیر سے 32 کیسز رپورٹ ہوئے ہیں۔

این سی او سی کے تازہ اعداد و شمار کے مطابق  پنجاب میں کورونا سے 807 اور سندھ میں 738 افراد انتقال کرچکے ہیں جب کہ خیبر پختونخوا میں 610 افراد جان کی بازی ہار گئے ۔