جامعہ بنوریہ کراچی کے  مہتمم مفتی نعیم کے انتقال پر پاکستان کی اہم سیاسی شخصیتوں کی جانب سے گہرے دکھ کا اظہار کیا گیا ہے۔

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہبازشریف نے ممتاز عالم دین مفتی نعیم کے انتقال پر رنج وغم اور افسوس کا اظہار کیا ہے۔

انہوں نے کہا ہے کہ مفتی نعیم کی رحلت ملک وملت کے لئے ایک بڑا نقصان ہے لیکن اب دین کی تبلیغ، ترویج اور اشاعت کے لئے ان کی عظیم خدمات تاریخ کا حصہ بن چکی ہیں۔

جمعیت علماء اسلام کے سربراہ مولانا فضل الرحمن کی جانب سے بھی مفتی محمد نعیم کے انتقال پر دکھ اور افسوس کا اظہار کیا گیا ہے۔

مولانا صاحب کا کہنا تھا کہ پاکستان ایک  بڑے عالم دین سے محروم ہوگیا ہے اور دعاء ہے کہ اللہ پاک مفتی محمد نعیم کے درجات بلند فرمائے۔

مفتی نعیم صاحب کے انتقال پر وفاقی وزیر سمندری امور علی زیدی نے ٹویٹ کے ذریعے اپنے پیغام میں کہا ہے کہ جامعہ بنوریہ کراچی کے مہتمم مفتی نعیم صاحب کے انتقال پر گہرا دکھ اور رنج ہوا، دعا گو ہوں کہ مفتی صاحب کو کروٹ کروٹ جنت نصیب ہو۔

اس کے علاوہ قومی اسملبی کے اسپیکر اسد قیصر، امیر جماعت اسلامی پاکستا ن سینیٹر سراج الحق، ترجمان سندھ حکومت بیرسٹر مرتضی وہاب کی جانب سے بھی مفتی صاحب کے انتقال پر اظہار افسوس اور دعائے مغفرت کی گئی ہے۔