جمعیت علماء اسلام کے سربراہ مولانا فضل الرحمن نے کورونا وائرس میں مبتلا اپوزیشن لیڈر شہباز شریف کو ٹیلی فون کر کے ان کی خیریت دریافت کی۔

تفصیلات کے مطابق جمعیت علماء اسلام کے سربراہ مولانا فضل الرحمن نے پاکستان مسلم لیگ (ن) کے صدر اور قائد حزب اختلاف میاں شہباز شریف کو آرام کرنے کا مشورہ دیا،  کورونا  ٹیسٹ مثبت آنے،  قرنطینہ اور علاج سے متعلق دریافت کیا۔

اس موقع پر مولانا فضل الرحمن نے شہباز شریف سے پارٹی رہنمائوں احسن اقبال،  ایاز صادق سمیت دیگر کی  بھی خیریت دریافت کی۔

مولانا فضل الرحمن نے ٹیلی فون رابطے میں شہباز شریف کی خیریت دریافت کرنے کے بعد دعا کرتے ہوئے کہا کہ اللہ اس وباء سے متاثر تمام افراد کو جلد صحت یاب کریں۔

یاد رہے کہ قومی اسمبلی میں قائد حزب اختلاف شہباز شریف بھی کورونا وائرس کا شکار ہوگئے۔

شہباز شریف کے کورونا ٹیسٹ مثبت آنے پر بیان میں فیاض الحسن چوہان نے کہا تھا کہ کورونا میں مبتلا دیگر لیگی قائدین کے لیے بھی جلد صحتیابی کی دعا کرتے ہیں۔

انہوں نے کہا تھا شہباز شریف کا صحت مند رہنا پاکستان اور پاکستانی عوام کے لیے بڑا ضروری ہے، امید ہے شہباز شریف قرنطینہ کے بعد کورونا کے خلاف عملی اقدامات میں بڑھ چڑھ کر حصہ لیں گے۔

لیگی رہنما عطاء اللہ تارڑ نے قوم سے شہباز شریف کی جلد صحتیابی کے لئے دعا کی ہے۔

شہبازشریف کا کورونا ٹیسٹ آگیا

مسلم لیگ ن کی ترجمان مریم اورنگزیب کے مطابق شہباز شریف بار بار کورونا کے ٹیسٹ کرا رہے تھے، وہ ڈاکٹروں کی ہدایات پر عمل کر رہے ہیں۔