پاکستان پیپلز پارٹی کے چیئرمین بلاول بھٹو زرداری اور مولانا فضل الرحمان میں حکومتی بجٹ مکمل طور پر مسترد کرنے پر اتفاق کیا گیا ہے۔

تفصیلات کے مطابق پاکستان پیپلزپارٹی کے چیئرمین بلاول بھٹو زرداری اور مولانا فضل الرحمان کے درمیان ٹیلی فونک رابطہ ہوا ہے جس میں دونوں جانب سے حکومتی بجٹ مسترد کرنے پر اتفاق کیا گیا ہے۔

 رابطے کے دوران چیئرمین بلاول بھٹو زرداری اور مولانا فضل الرحمان کے درمیان ملک میں کورونا وائرس کے پھیلاؤ کا معاملہ زیربحث آیا جبکہ بلاول بھٹو نے باور کروایا ہے کہ ملک میں حکومتی نااہلی کی وجہ سے کورونا وائرس پھیلا ہے۔

 بلاول بھٹو کا کہنا تھا کہ پاکستان کے عوام غریب دشمن بجٹ کو مسترد کرچکے ہیں اور ہم ملکی آئین پر حملوں کو کسی صورت برداشت نہیں کریں گے۔

بلاول اور شہباز شریف کا بجٹ کو مسترد کرنے پر اتفاق

 چیئرمین بلاول بھٹو زرداری اور مولانا فضل الرحمان کے درمیان آئندہ ہفتے اے پی سی بلانے پر بھی مشاورت کی گئی ہے۔

یاد رہے کہ اس سے قبل چیئرمین پاکستان پیپلز پارٹی بلاول بھٹو زرداری اور قومی اسمبلی میں اپوزیشن لیڈر، مسلم لیگ ن کے صدر میاں محمد شہبازشریف کے درمیان ٹیلی فونک رابطہ ہوا تھا۔

بلاول بھٹو زرداری نے میاں شہباز شریف سے فون پر ان کی صحت سے متعلق دریافت کیا۔

چیئرمین پاکستان پیپلز پارٹی اور شہباز شریف کے درمیان رواں ماہ پیش کیے گئے وفاقی بجٹ کو مکمل طور پر مسترد کرنے پر بھی اتفاق کیا گیا۔

دوران رابطہ دونوں رہنماؤں کے درمیان ملک کی مجموعی صورتحال پر بھی تبادلہ خیال کیا گیا تھا۔

واضح رہے کہ شہباز شریف نے پاکستان پیپلز پارٹی کے شریک چیئرمین آصف زرداری کیلئے نیک تمناؤں کا اظہار کیا اور بلاول بھٹو سے ان کے والد کی صحت کے حوالے سے بھی دریافت کیا۔