چیئر مین پاکستان پیپلزپارٹی  بلاول بھٹو زرداری کا کہنا ہے کہ پیٹرول مہنگا کرکے غریب عوام سے دشمنی کی گئی ہے۔

تفصیلات کے مطابق چیئرمین پاکستان پیپلز پارٹی بلاول بھٹو زرداری نے بلوچستان نیشنل پارٹی کے سربراہ سردار اختر مینگل کو فون کرکے ملک کی سیاسی صورتحال ، کورونا وائرس اور ٹڈی دَل کے معاملات پر تبادلہ خیال کیا۔

سردار اخترمینگل سے گفتگو کرتے ہوئے چیئرمین پیپلزپارٹی  نے پیٹرولیم مصنوعات کی قیمتوں میں غیرمعمولی اضافے کو مسترد کرتے ہوئے کہا ہے کہ ایسے وقت جب عوام کو ریلیف دینے کی ضرورت تھی پیٹرول مہنگا کرکے غریب عوام سے دشمنی کی گئی ہے۔

بلاول بھٹو نے کہا کہ عوام کی جیبوں پر ڈاکہ ڈال کر عمران خان اپنی نااہلی کی وجہ سے ڈوبتی ہوئی معیشت کو سہارا نہیں دے سکتے۔ عمران خان نے پہلے پیٹرول سستا کروا کر ذخیرہ کروایا اور پھر مہنگا کرکے مافیا کو فائدہ پہنچایا۔

انہوں نے کہا کہ سلیکٹڈ وزیراعظم کو عام آدمی کی کوئی فکر نہیں ہے۔ پیٹرول سستا ہونے سے ضروریات زندگی کی اشیاءسستی نہیں ہوئیں مگر پیٹرول مہنگا ہونے سے مہنگائی مزید بڑھے گی۔

چیئر مین پیپلز پارٹی نے کہا کہ سلیکٹڈ وزیراعظم کے اقتدار کا ایک ایک دن عوام کی مشکلات میں بے پناہ اضافہ کر رہا ہے۔

بجٹ کے حوالے سے گفتگو کرتے ہوئے بلاول بھٹو نے کہا کہ پی ٹی آئی اور آئی ایم ایف کا مشترکہ بجٹ عوام دشمن بجٹ ہے۔ ہم اسے کسی صورت نہیں مان سکتے۔

انہوں نے مزید کہا کہ اٹھارہویں آئینی ترمیم پر تنقید کرکے عمران خان ملک کے دستور پر حملے کر رہے ہیں۔

چیئرمین پیپلز پارٹی نے کہا کہ حکومت کی نااہلی کی وجہ سے آج کورونا وائرس بھی ہر جگہ پھیل چکا ہے۔

دونوں رہنماؤں نے ملک میں کورونا وائرس کے پھیلاؤ پر انتہائی تشویش کا اظہار کیا۔

چیئرمین پیپلزپارٹی اور سردار اختر مینگل کے درمیان این ایف سی ایوارڈ کے حوالے سے بھی حکومتی اقدامات پر گفتگو ہوئی۔

بلاول بھٹو زرداری نے بلوچستان نیشنل پارٹی کے سربراہ سے آئندہ ہفتے بلائی جانے والی اے پی سی کے حوالے سے بھی مشاورت کی۔