کوئٹہ: پاکستان کوسٹ گارڈز کی اسمگلنگ کے خلاف مختلف کارروائیوں کے نتیجے میں بھاری مقدار میں چھالیہ، ایرانی ڈیزل اور متفرق اشیاء برآمد کرلیا گیا ہے۔

تفصیلات کے مطابق ترجمان کوسٹ گارڈز کا کہنا ہے کہ وندر اور گوادر (بلوچستان) سے بھاری مقدار میں چھالیہ، ایرانی ڈیزل اور متفرق اشیاء برآمد کرلی گئی ہیں۔

ناکہ کھاری چیک پوسٹ اور وندر شہر کے قریب مختلف گاڑیوں کی تلاشی کے دوران 34,394 کلو گرام چھالیہ اور 45 ٹن فلورائٹ اسٹون برآمد کیا گیا ہے جبکہ کارروائی کے دوران 17 افراد کو گرفتار بھی کر لیا گیا ہے۔

ترجمان کا کہنا ہے کہ گوادر(بلوچستان) میں کھلے سمندر میں مچھلی کا شکار کر نے والی لانچ کے خفیہ خانوں میں چھپایا گیا 18,000 لیٹر ایرانی پیٹرول برآمدر کیا گیا ہے جبکہ لانچ کو قبضے میں کر کے ایک شخص کو گرفتار بھی کر لیا گیا ہے۔

ترجمان کا کہنا تھا کہ گوادر سے 25 تارکین وطن جن میں 01 نائیجرین بھی شامل ہےجسے بروقت گرفتارکرلیا گیا ہے جبکہ گرفتار کئے گئے افراد غیر قانونی طور پر بیرون ملک سے پاکستان آنے کی کوشش کر رہے تھے۔

ترجمان کوسٹ گارڈز کا کہنا ہے کہ ابتدائی تفتیش کے بعد تمام تارکین وطن کو ایف آئی اے کے حوالے کر دیا گیا ہے جبکہ پکڑی جانے والی چھالیہ، ایرانی ڈیزل، لانچ اور گاڑیوں کی مالیت تقریباً10 کروڑ74لاکھ روپے ہے۔