وزیر خارجہ شاہ محمود قریشی نے کہا کہ ان ظالمانہ اقدامات کی وجہ سے بھارت کے زیرقبضہ جموں وکشمیر میں انسانی حقوق کی سنگین پامالیاں ہورہی ہیں اور وہاں بسنے والے انسانوں کو بدترین صورتحال کا سامنا ہے۔

تفصیلات کے مطابق وزراء خارجہ کی سطح پر اسلامی ممالک میں تعاون کی تنظیم (او۔آئی۔سی) کی ایگزیکٹو کمیٹی کا غیرمعمولی ورچوئل اجلاس آج منعقد ہوا جس میں وزیر خارجہ شاہ محمود قریشی کی مسئلہ فلسطین پر او۔آئی۔سی کے غیرمعمولی ورچوئل اجلاس میں شرکت کی۔

اجلاس میں ”ریاست فلسطین کے 1967 میں قبضہ کردہ حصوں کو اسرائیلی قابض حکومت کی جانب سے اپنے اندر ضم کرنے کی دھمکیوں“ پر غور کیا گیا۔

فلسطین کے وزیر خارجہ کی درخواست پر او۔آئی۔سی جنرل سیکریٹریٹ کے طلب کردہ اجلاس میں او۔آئی۔سی کے رکن ممالک کے وزرا خارجہ اور نمائندوں نے شرکت کی جبکہ پاکستانی وفد کی قیادت وزیر خارجہ مخدوم شاہ محمود قریشی نے کی۔

وزیر خارجہ شاہ محمود قریشی نے اپنے خطاب میں اسرائیل میں اتحادی جماعتوں کے درمیان مقبوضہ فلسطینی علاقہ جات بشمول وادی اردن کے حصوں کو اپنے اندر ضم کرنے کا فریم ورک معاہدہ طے پانے پر شدید تشویش کا اظہار کیا۔

اجلاس میں اسرائیل پر زور دیا گیا کہ اقوام متحدہ کی قراردادوں اور عالمی قانون کی خلاف ورزی کرتے ہوئے کسی بھی فلسطینی مقبوضہ حصے کو ضم کرنے کے کسی بھی یک طرفہ اقدام سے باز رہے۔

فلسطینی عوام کے ساتھ پاکستان کی یکجہتی کا اعادہ کرتے ہوئے وزیر خارجہ شاہ محمود قریشی نے عالمی طے شدہ حدودقیود کی بنیاد پر 1967 سے قبل کی سرحدات اورالقدس الشریف دارالحکومت کی حامل خودمختار، قابل عمل اور متصل ریاست فلسطین کے قیام کے پاکستان کے مطالبہ کو دوہرایا۔

اپنے خطاب میں وزیر خارجہ شاہ محمود قریشی نے فلسطین اور کشمیر کی آزادی کی تحاریک کی مشترک نوعیت کو اجاگر کیا اور کہا کہ یہ اقوام متحدہ اور او۔آئی۔سی کے ایجنڈے پر طویل ترین عرصہ سے زیرالتوا امور ہیں جن کی بنیاد متعلقہ خطوں کے عوام کے ناقابل تنسیخ استصواب رائے کے حق پر ہے۔

خطاب میں وزیر خارجہ نے 5 اگست 2019 سے بھارت کے غیرقانونی اور یک طرفہ اقدامات کے بعد سے بھارت کے زیرقبضہ جموں وکشمیر کے عوام کے خلاف جاری مسلسل غیرانسانی لاک ڈاون، فوجی محاصروں، کمیونیکیشن پابندیوں اور غیرمعمولی قید وبند کی صعوبتوں کو بیان کیا۔

وزیر خارجہ نے عالمی برادری پر زور دیا کہ صورتحال کا نزاکت کا ادراک کرتے ہوئے اقوام متحدہ کی متعلقہ قراردادوں، عالمی قانون اور وہاں کے عوام کی امنگوں وخواہشات کے مطابق فلسطین اور کشمیر کے دیرینہ تنازعات کے حل میں اپنا فعال کردار ادا کرے۔