چیئر مین پاکستان پیپلز پارٹی بلاول بھٹو زرداری کا کہنا ہے کہ وفاقی بجٹ میں کورونا سے نمٹنے کے لیے کوئی ترجیحات  شامل نہیں ہیں ۔

کراچی  میں  وزیر اعلیٰ سندھ کے ہمراہ پریس کانفرنس  کرتے ہوئے چیئر مین پاکستان پیپلز پارٹی بلاول بھٹو زرداری نے کہا کہ  گذشتہ روز کراچی   ، گھوٹکی اور لاڑکانہ میں ہونے والے حملوں کی مزمت کرتے ہیں۔

چیئر مین پیپلز پارٹی نے کہا کہ پولیس کوشش کر رہی ہے کہ وہ ان دہشت گردوں کو پکڑیں اور کیفرکردار تک پہنچائیں۔

بلاول بھٹونے وفاقی حکومت کے بجٹ پر تنقید کرتے ہوئے کہا کہ  کہا کہ وفاق کو  چاہئے تھا ہر صوبے کو کورونا پیکج دیتی۔

انہوں نے کہا کہ تحریک انصاف کی  حکومت ناکام ہوگئی ہے۔ بجٹ پر سب نے تبصرہ کیا تھا کہ اسے کورونا کے حوالے سے مرتب کیا جائے گا لیکن ایسا نہ ہوا۔

چیئر مین پیپلز پارٹی نے کہا کہ یہ  وفاقی بجٹ ایسا  ہے جیسے کورونا کوئی مسئلہ ہی نہیں ہے۔بجٹ میں کورونا سے نمٹنے کے لیے کوئی ترجیحات  شامل ہی نہیں ہیں ۔

بلاول بھٹو  نے کہا کہ   ٹڈی دل ملک بھر میں فصلوں کو ضائع کر رہے ہیں۔  ہم ایک سال سے کہہ رہے ہیں لیکن ہماری کسی نے نہیں سنی،  ہم اپنے طور پر ٹڈی دل کے خاتمے کی کوشش کر رہے ہیں۔

انہوں نے مزید کہا کہ  صوبہ سندھ تمام صورتحال کو دیکھ اپنا بجٹ بنایا۔  سندھ حکومت نے عوام دوست بجٹ دیا ہے۔

چیئر مین پیپلز پارٹی نے کہا کہ  سندھ حکومت نے سرکاری ملازمین  کی تنخواہیں اور پینشنز بڑھائی  ہیں اگر پیسے زیادہ ہوتے تو مزید  بھی بڑھاتے۔

بلاول بھٹو کا کہنا تھا کہ وفاقی حکومت کے پاس غریبوں کو سہولت پہنچانے کا کوئی طریقہ کار نہیں ہے جبکہ ہم نے اس مشکل وقت میں بھی عوام کو نہیں چھوڑا۔

انہوں نے کہا کہ  سندھ حکومت نے مختلف عوامی منصوبے شروع کیے،صحت کے بجٹ کو بڑھایا ہے کسانوں کے لیے بھی سہولت رکھی ہے۔

چیئر مین پیپلز پارٹی نے مزید کہا کہ سندھ حکومت نے بے روزگاروں کے لیے بھی وظیفہ رکھا ہے۔ہم نے پیسہ عوام کی زندگی اور صحت کے لیے مختص کیا ہے۔

بلاول بھٹو نے کہا کہ  ہم نے بجٹ میں صحت کے لیے تاریخی اضافہ کیا  ہے۔فخر کرتا ہوں کہ اس وبا ءمیں سندھ حکومت نے لوگوں کا خیال رکھا ہے ۔

چیئرمین پیپلز پارٹی نے حکومت کی ناکام پالیسیوں پر مسلم لیگ ن کے صدر شہباز شریف کے صحتیاب ہونے  کے بعد آل پارٹیز کانفرنس بلانے کا اعلان کردیا۔