وزیراعلیٰ بلوچستان جام کمال خان سے وزیراعظم کے معاون خصوصی براۓ اطلاعات اور چئیرمین سی پیک کمیٹی لیفٹینٹ جنرل (ر) عاصم سلیم باجوہ نے ملاقات کی۔

 ملاقات میں بلوچستان کے ترقیاتی امور کورونا وائرس کی صورتحال سمیت باہمی دلچسپی کے دیگر امور پر تبادلہ خیال گیا گیا جبکہ بلوچستان میں امن وامان کی صورتحال پر اطمینان کا اظہار کیا گیا۔

اس موقع پر وزیر اعلیٰ بلوچستان جام کمال خان نے کہا کہ بلوچستان کی ترقی کے لیۓ تمام وسائل بروۓ کار لا ۓ جا رہے ہیں  جسکے لیۓ وفاقی حکومت کا تعاون بھی ناگزیر ہے

جام کمال خان نے یہ بھی کہا کہ وزیراعظم عمران خان سے انتہائی مفید ملاقات ہوئی ہے جنہوں نے بلوچستان کی ترقی کے لیۓ بھرپور تعاون کی یقین دہانی کرائی ہے ۔

وزیر اعلیٰ بلوچستان جام کمال خان نے مزید کہا کہ نئ سرمایہ کاری اور بنیادی ڈھانچے کی تعمیر سے بلوچستان ترقی کی راہ پر گامزن ہو گا۔

وزیراعظم کے معاون خصوصی براۓ اطلاعات نے کہا کہ وفاقی پی ایس ڈی پی میں بلوچستان کو ترجیح دیئے جانے  کے حق میں ہیں بلوچستان ملک کا سب بڑا اور جغرافیائی و معدنی وسائل کے حوالے سے اہم صوبہ ہے۔

 عاصم سلیم باجوہ نے یہ بھی کہا کہ بلوچستان میں خدمات سر انجام دیں ہیں اس سے انہیں خصوصی انسیت ہے اور وہ صوبے کی ترقیاتی ضرورتوں سے آگاہ ہیں۔

 وزیراعظم کے معاون خصوصی براۓ اطلاعات اور چئیرمین سی پیک کمیٹی لیفٹینٹ جنرل (ر) عاصم سلیم باجوہ نے مزید کہا کہ وہ قومی میڈیا میں بلوچستان کی کوریج میں اضافہ کے لیۓ کردار ادا کریں گے۔

صوبہ بلوچستان کی سماجی و معاشی ترقی اولین ترجیح ہے، وزیراعظم

واضح رہے اس سے قبل وزیراعظم عمران خان سے وزیر اعلیٰ بلوچستان جام کمال خان کی ملاقات ہوئی، ملاقات میں کورونا وائرس کی روک تھام کے حوالے سے اقدامات پر گفتگو کی گئی جبکہ صوبہ بلوچستان میں جاری ترقیاتی منصوبوں  سے متعلقہ امور پر تبادلہ خیال کیا گیا تھا۔

اس موقع پر وزیراعظم عمران خان نے کہا تھا کہ صوبہ بلوچستان کے عوام کی فلاح و بہبود اور صوبے کی سماجی و معاشی ترقی اولین ترجیحات میں شامل ہے جبکہ صوبائی حکومت  کو ہر ممکنہ تعاون  فراہم کیا جائے گا۔