وزیراعلی بلوچستان جام کمال نے کہا ہے کہ بلوچستان ملک میں سب سے پہلے ٹیکس اصلاحات لارہا ہے۔

تفصیلات کے مطابق بلوچستان اسمبلی کے بجٹ اجلاس کے بعد میڈیا سے بات چیت کرتے ہوئے وزیراعلی بلوچستان جام کمال نے کہا ہے کہ بلوچستان ملک میں سب سے پہلے ٹیکس اصلاحات لارہا ہے  اور ریکوڈک جیسے منصوبے کو چلانے کے منصوبہ بندی کررہے ہیں جس میں 90 فیصد حصہ دار ہوں گے ۔

ان کا کہنا تھا کہ بجٹ میں تمام شعبوں کو ترقی کی راہ پر گامزن کرنے کی کوشش کی ہے، گذشتہ سال کے اکثر منصوبے مکمل کئے ہیں۔

انہوں نے کہا کہ 2 ہزار کلو میٹر کے نئے چھوٹے، درمیانی اور بڑے روڈ نئے بجٹ میں بنائیں گے جبکہ صوبے کے تمام گرلز انٹر کالجز کو ڈگری کا درجہ دے دیا گیا ہے اور ہر ضلع میں کیڈٹ کالج یا ریزیڈنشنل کالج بنائے جائیں گے۔

انہوں نے مزید کہا کہ روزگار پیداکرنے کے لئے اقدامات بھی کئے جائیں گے ۔

جام کمال نے کہا ہے  کہ بلوچستان میں ریونیو بڑھانے کے لئے نیا ٹیکسیشن سسٹم متعارف کرائیں گے۔

انہوں نے کہا ہے کہ ترقیاتی عمل میں اپوزیشن کو ساتھ لیکر چل رہے ہیں جبکہ بجٹ میں بھی ہر پہلو کو مدنظر رکھا گیا ہے کیونکہ بنیادی ڈھانچہ ہو تعلیم ہو صحت ہو یا معاشی اصلاحات ریونیو کا ہدف ہو سب کو پورا کیا جائے گا۔

گزشتہ سال بھی جو اہداف مقرر کئے تھے اس میں کامیاب ہوئے اس سال صحت عامہ حکومت کی ترجیح ہے۔