وزیر خارجہ شاہ محمود قریشی نے کہا ہے کہ پی ٹی آئی کی حکومت میں اپوزیشن کو کبھی کامیابی نہیں ملے گی۔

تفصیلات کے مطابق وزیرخارجہ مخدوم شاہ محمود قریشی نے پارلیمنٹ میں میڈیا سے گفتگو کرتے ہوئے کہا ہے کہ قوم نے دیکھا ہے کہ اپوزیشن کا کوئی نظریہ نہیں ہے جس کے بعد آج اپوزیشن عددی طورپر بے نقاب ہوگئی ہے۔

وزیر خارجہ نے بجٹ کے حوالے سے بات کرتے ہوئے بتایا کہ اپوزیشن نے بجٹ کے حوالے سے بات کی تھی کہ تحریک انصاف کا کوئی ایم این اے آگے پیچھے نہیں ہوگا لیکن تحریک انصاف کے ممبران کا آگے پیچھے ہونا اپوزیشن کی خام خیالی ہے۔

انہوں نے بتایا کہ پارٹی ممبران کو اپوزیشن کی جانب سے بہت جھانسے اورلقمے دینے کی کوشش کی گئی لیکن ناکام ہوئے اور آئندہ بھی ناکام ہی ہونگے ۔

بجٹ 21-2020 ، قومی اسمبلی میں کثرت ِ رائے سے منظور

شاہ محمود قریشی نے کہا کہ آج ثابت ہوگیا ہے کہ عمران خان کو ایوان کا اعتماد کل بھی حاصل تھا اور آج بھی حاصل ہے۔

اپوزیشن کو تنقید کا نشانہ بناتے ہوئے انہوں نے کہا ہے کہ بلاول بھٹو فلور پر کھڑے ہوکر کہتے ہیں کہ تم معافی مانگو،اور ن لیگ ڈیسک بجاتی ہے اور اگر ن لیگ اور پیپلزپارٹی ایک ہیں تو ایک دوسرے میں زم کیوں نہیں ہوجاتے ہیں۔

واضح رہے کہ قومی اسمبلی میں مالی سال 21-2020 کے لیے پاکستان تحریک انصاف کی حکومت کی جانب سے پیش کردہ بجٹ منظور کرلیا گیا ہے۔

اسپیکر قومی اسمبلی اسد قیصر کی سربراہی میں ہونے والے قومی اسمبلی کے اجلاس میں وزیراعظم عمران خان، وزیر خارجہ شاہ محمود قریشی، چیئرمین پیپلزپارٹی بلاول بھٹو نے بھی شرکت کی۔

بجٹ کی منظوری کے بعد اسپیکر نے قومی اسمبلی کا اجلاس منگل کی صبح 11 بجے تک ملتوی کردیا۔

قومی اسمبلی کے بعد بجٹ کی منظوری سینیٹ سے بھی لی جائے گی جس کے بعد صدر مملکت اس پر دستخط کریں گے۔