مرکزی رویت ہلال کمیٹی کی جانب سے ذی الحج کے چاند کےاعلان پر وفاقی وزیر فواد چوہدری کی جانب سے برہمی کا اظہار کیا گیا ہے۔

تفصیلات کے مطابق وفاقی وزیر برائے سائنس اینڈ ٹیکنالوجی فواد چوہدری کی جانب سے رویت ہلال کمیٹی کے ذی الحج کے چاند نظر نہ آنے پر برہمی کا اظہار کرتے ہوئے کہا کہ اگر نماز گھڑی دیکھ کر ہوسکتی ہے تو چاند ٹیکنالوجی سے کیوں نہیں دِکھ سکتا ہے؟

رویت ہلال کمیٹی کی جانب سے کہا گیا ہے کہ بادلوں کی وجہ سے چاند نظر نہیں آیا ہے جس پر فواد چوہدری نے جواباً کہا ہے کہ بادل ہیں تو چاند کہاں سے نظر آئے گا لیکن رویت ایپ پر دیکھیں گے تو چاند نظر آئے گا۔

چاند نظر نہیں آیا، عید الاضحیٰ یکم اگست کو ہوگی

وفاقی وزیر سائنس و ٹیکنالوجی نے مزید کہا ہے کہ ٹیکنالوجی حلال ہے یا حرام علماء کرام پہلے یہ طے کرلیں کیونکہ سائنسی لحاظ سے چاند نظر آچکا ہے۔

یادرہے کہ مرکزی رویت ہلال کمیٹی کا اجلاس کراچی میں منعقد کیا گیا تھا جس میں ماہ ذی الحج کے چاند کے لئے رویت کا شرعی فیصلہ کرنے کے لیے مرکزی رویت ہلال کمیٹی کا اجلاس نماز مغرب کے وقفے کے بعد جاری تھا۔

بعد اجلاس مفتی منیب الرحمان نے پریس کانفرنس کرتے ہوئے اس بات کا اعلان کیا کہ ملک بھر میں زونل رویت ہلال کمیٹی کے اجلاس منعقد ہوئے لیکن پاکستان میں بیشتر مقامات پر مطلع ابر آلود تھا جس کے باعث چاند نظر آنے کی شہادت موصول نہیں ہوئی لہذاعید الاضحٰی یکم اگست کو ہوگی۔