وزیراعظم عمران خان نے کہا ہے کہ ٹائیگر فورس مستقبل میں ملک کا قیمتی اثاثہ بننے جا رہی ہے۔

تفصیلات کے مطابق وزیراعظم عمران خان سے معاون خصوصی عثمان ڈار کی ملاقات ہوئی جس میں ٹائیگر فورس کیلئے بنائی گئی ایپلیکیشن کے اجراء پر تبادلہ خیال کیا گیا۔

اس موقع پر وزیراعظم نے ملک بھر میں ایپلیکیشن کے اجراء کی منظوری دے دی جبکہ ٹائیگر فورس کے ساتھ متحرک ارکان اسمبلی کی رپورٹ بھی طلب کرلیا۔

وزیراعظم عمران خان نے کہا کہ بتایا جائے کس رکن اسمبلی نے ٹائیگر فورس کو متحرک کرنے میں کتنا کردار ادا کیا، عوامی نمائندوں کی جانب سے نوجوان رضا کاروں کی سرپرستی ضروری ہے۔

ملاقات میں معاون خصوصی نے کہا کہ وزیراعظم نے ٹائیگر فورس کی خدمات کا دائرہ کار وسیع کرنے کا فیصلہ کیا ہے ،ٹائیگر فورس کیلئے ڈیجیٹل ٹیکنالوجی کو استعمال میں لانے کا فیصلہ کیا گیا یے۔

اسمارٹ لاک ڈاؤن کے مثبت نتائج سامنے آرہے ہیں، وزیراعظم

عثمان ڈار نے یہ بھی کہا کہ ٹائیگر فورس کو ضلع,تحصیل, یونین کونسل اور وارڈ کی سطح پر مانیٹر کیا جا سکے گا جبکہ ایپلیکیشن کے ذریعے سمارٹ لاک ڈاؤن پر عملدرآمد کروانے میں بھی آسانی ہوگی۔

معاون خصوصی عثمان ڈار نے مزید کہا کہ کورونا سے متاثرہ ہاٹ اسپاٹ کی فوری نشاندہی بھی ممکن ہوگی جبکہ ٹائیگر فورس کی ٹیمیں بنا کر کپتان اور وائس کپتان بھی نامزد کئے جائیں گے۔

دوسری جانب وزیراعظم عمران خان کی زیر صدارت وفاقی کابینہ کا اجلاس  ہوا۔

ذرائع کا کہنا ہے کہ وفاقی کابینہ  کے اجلاس میں  ملکی سیاسی اور  معاشی صورتحال پر غور کیا گیا۔ کابینہ کے ارکان نے بجٹ کی منظوری پر وزیر اعظم کو مبارکبادپیش کی۔

اجلاس میں وزیراعظم کو یورپی یونین کی جانب سے پی آئی اے پر پابندی پر بریفنگ  دی گئی۔کابینہ کو کورونا وائرس کی تازہ صورتحال پر بھی بریفنگ دی گئی جس میں این سی او سی کے اعدادو شمار سے آگاہ کیا گیا۔

کورونا وائرس کی صورتحال کے حوالے سے وزیر اعظم نے کہا کہ  اسمارٹ لاک ڈاؤن کے مثبت نتائج سامنے آرہے ہیں، عوام میں آگاہی سب سے اہم ہے۔