چیئرمین پی پی پی بلاول بھٹو زرداری نے کہا ہے کہ ملک کی تمام اپوزیشن جماعتیں سلیکٹڈ حکومت کے خلاف ایک پیچ پر ہیں۔

تفصیلات کے مطابق سابق صدر آصف علی زرداری اور چیئرمین پی پی پی بلاول بھٹو زرداری سے مولانا فضل الرحمان کی بلاول ہاؤس میں ملاقات ہوئی جس میں پاکستان پیپلزپارٹی اور جمعیت علمائے اسلام کا ملکی سالمیت اور بقا کے خاطر سیاسی امور میں ساتھ چلنے پر اتفاق کیا گیا۔

اس موقع پرمولانا فضل الرحمان نے سابق صدر آصف علی زرداری کی صحت سے متعلق خیریت دریافت کی جبکہ سابق صدر آصف علی زرداری اور چیئرمین پی پی پی بلاول بھٹو زرداری کی مولانا فضل الرحمان سے اہم سیاسی امور پر گفتگو ہوئی۔

سابق صدر آصف علی زرداری، چیئرمین پی پی پی بلاول بھٹو زرداری اور مولانا فضل الرحمان کا این ایف سی ایوارڈ پر غیرلچکدار مؤقف اپنانے پر اتفاق کیا گیا۔

سابق صدر آصف علی زرداری نے مولانا فضل الرحمان سے مکالمہ کرتے ہوئے کہا کہ عوام دشمن بجٹ اور این ایف سی ایوارڈ سے متعلق کوئی سمجھوتہ نہیں ہوگا۔

سابق صدر آصف علی زرداری نے کہا کہ میں نے پہلے ہی کہہ دیا تھا کہ عمران خان حکومت چلانے کے اہل نہیں، گزشتہ برس میں نے ٹِڈی دَل کے حملوں سے متعلق پارلیمان میں حکومت کو خبردار کیا تھا۔

بلاول بھٹو اپوزیشن کی آل پارٹیز کانفرنس بلانے کے کیلئے متحرک

آصف علی زرداری نے یہ بھی کہا کہ حکومت نے اپنی ضد اور انا کی وجہ سے ٹِڈی دَل کے حملوں سے متعلق میرے خدشات کو سنجیدہ نہیں لیا اگر ٹِڈی دَل کے حملوں کی فوری روک تھام نہ کی گئی تو ملک میں خوراک کا بحران پیدا ہوجائے گا۔

سابق صدر آصف علی زرداری نے مزید کہا کہ کورونا وائرس کے بحران کے دنوں میں عمران خان کی نااہلی کھل کر سامنے آچکی ہے، عوام امید کی نظروں سے ملک کی اپوزیشن جماعتوں کی جانب دیکھ رہے ہیں کہ وہ سلیکٹڈ حکومت سے انہیں نجات دلائیں۔

چیئرمین بلاول بھٹو زرداری نے مولانا فضل الرحمان سے مکالمہ کرتے ہوئے کہا کہ پاکستان اورعمران خان ساتھ ساتھ نہیں چل سکتے، عمران خان کے دورِحکومت میں ملک میں سب سے زیادہ کرپشن میں اضافہ ہوا۔

چیئرمین پی پی پی بلاول بھٹو زرداری نے مزید کہا کہ عمران خان نیب کو استعمال کرکے اپوزیشن جماعتوں کے سیاست دانوں سے انتقام لے رہے ہیں، دوسال ہوگئے ہیں، عمران خان نے کوئی ایک ایسا کام نہیں کیا جو عوامی مفاد میں ہو۔

مولانا فضل الرحمان نے پی پی قیادت سے مکالمہ کرتے ہوئے کہا کہ پی ٹی آئی حکومت نے ملکی معیشت کو دیوار سے لگادیا ہے، پاکستان کی تاریخ میں کبھی معیشت کی منفی شرح نمو نہیں ہوئی اور اگر معیشت کو بچانا ہے تو سب نے ملک کر سلیکٹڈ حکمرانوں کا مقابلہ کرنا ہوگا۔