پاکستان پیپلز پارٹی کے چیئرمین بلاول بھٹو زرداری کا کہنا ہے کہ  آج 25 جولائی ہے اور پاکستان میں یہ دن یوم سیاہ کے طور پر منایا جائے گا۔

چیئرمین پیپلز پارٹی بلاول بھٹو زرداری  کا پریس کانفرنس کرتے ہوئے کہنا تھا کہ  ہمیں سب یاد ہے کہ جو نتائج آئے ان کی کوئی قانونی حیثیت نہیں۔ پاکستان بھر میں پولنگ ایجنٹس کو پولنگ سٹیشن سے باہر نکالا گیا تھا۔

بلاول بھٹو نے کہا کہ   فارم 45 غائب کرائے گئے اور آج تک 90 فیصد فارم غائب ہیں، جو موجود ہیں ان پولنگ ایجنٹس کے دستخط نہیں ہیں ۔ میڈیا کو پولنگ اسٹیشن تک رسائی نہیں دی گئی۔

انہوں نے کہا کہ آج ملک کے عوام اور سیاسی جماعتیں ایک پیج پر ہیں کہ اس سیلکٹڈ عمران کو جانا پڑے گا، اگر کورونا وائرس نہ آتا تو پاکستان کی سیاسی جماعتیں اس وقت سڑکوں پر ہوتیں۔

چیئر مین پیپلز پارٹی نے کہا کہ   ٹرانسپیرنسی انٹرنیشنل کا تجزیہ ہے کہ جتنی کرپشن اس حکومت میں ہوئی اتنی کبھی نہیں ہوئی۔اس حکومت نے اپنے دور میں سب سے زیادہ ایمنسٹی دی۔

بلاول بھٹو نے کہا کہ بی آر ٹی بنانے والوں کو مزید کام پاکستان میں دیا جارہا ہے اور انہیں نیب سے استثنیٰ دیا گیا ہے۔عمران خان نے ہر مافیا کو این آر او دیا ہے۔

انہوں نے مزید کہا کہ  چینی ، تیل مافیا اور اب کلبھوشن کو بھی این آر او دے دیا۔ جس نے کشمیر کا سفیر بننا تھا وہ کلبھوشن کا وکیل بن گیا۔