وفاقی وزیر برائے منصوبہ بندی ترقی اور خصوصی اقدام اسد عمر کا کہنا ہے کہ حکومت سندھ کی جانب سے جاری  ترقیاتی کاوشوں  میں وفاقی حکومت مکمل تعاون کرے گی ۔

تفصیلات کے مطابق وفاقی وزیر  برائے منصوبہ بندی ترقی اور خصوصی اقدام اسد عمر  سے گورنر سندھ عمران اسماعیل   نے ملاقات کی۔

ملاقات میں پی ایس ڈی پی کے تحت سندھ میں جاری ترقیاتی منصوبوں کے حوالے سے تبادلہ خیال کیا گیا۔

اس موقع پر  اسد عمر نے  کہا کہ وزیر اعظم عمران خان نے کراچی پیکیج منصوبوں کو تیزی سے مکمل کرنے کا عزم کیا ہے۔

وفاقی وزیر برائے منصوبہ بندی کا کہنا تھا کہ  موجودہ حکومت کی اولین ترجیح  سندھ کے  شہریوں کو درپیش شہری اور نقل و حرکت سے متعلق مسائل کو حل کرنا ہے۔

انہوں نے مزید کہا کہ وفاقی حکومت ’ کے فور ‘ منصوبے پر صوبائی حکومت کے جواب کا انتظار کر رہی ہے ۔وفاقی حکومت اپنے فنڈز کا حصہ فراہم کرنے اور اس منصوبے کو تیز کرنے کے لیے درکار تمام اقدامات کرنے کے  لیے پرعزم ہے۔

گورنرسندھ عمران اسماعیل  نے وفاقی وزیر اسد عمر کو سندھ انفراسٹرکچر ڈویلپمنٹ کمپنی (ایس آئی ڈی سی ایل) کے ذریعہ جاری مختلف ترقیاتی سرگرمیوں کے حوالے سے آگاہ کیا۔

گورنر سندھ نے کہا کہ اس  کمپنی کے ذریعہ چلائے جانے والے منصوبے وقت پر مکمل ہوجائیں گے ۔