چیئرمین پیپلز پارٹی بلاول بھٹو زرداری نے کہا ہے کہ وفاقی حکومت کو کورونا وائرس کے خلاف جدوجہد کرنے والے فرنٹ لائن ورکرز کا مکمل ساتھ دینا چاہئیے۔

تفصیلات کے مطابق چیئرمین پیپلز پارٹی بلاول بھٹو زرداری نے اپنے ایک ویڈیو پیغام میں کہا کہ آج ہم نے پورے گلگت بلتستان ،آزاد کشمیر، خیبرپختونخوا، سندھ، پنجاب اور بلوچستان کے ینگ ڈاکٹرز ایسوسی ایشن کے نمائندگان کے ساتھ اجلاس کیا۔

اپنے بیان میں بلاول بھٹو زرداری نے کہا کہ آج ہم نے پورے پاکستان کے طبی عملے کے مسائل پر تفصیلی گفتگو کی، ڈاکٹرز کہہ رہے ہیں کہ وہ ملک میں مسائل کا سامنا کررہے ہیں۔

پاکستان پیپلزپارٹی کے چیئرمین بلاول بھٹو زرداری کا ویڈیو پیغام

Advertisement

آج ہم نے پورے پاکستان کے ینگ ڈاکٹرز ایسوسی ایشن کے نمائندگان کے ساتھ اجلاس کیا، چیئرمین بلاول بھٹو زرداری@BBhuttoZardari pic.twitter.com/ZvuRT5V7bY

— PPP (@MediaCellPPP) July 3, 2020

چیئرمین پیپلز پارٹی نے یہ بھی کہا کہ آزاد کشمیر کے پرامن احتجاج کرنے والے ڈاکٹرز پر تشدد کرکے انہیں گرفتار کیا گیا، آزاد کشمیر کے ڈاکٹرز صرف اپنے حقوق کا مطالبہ کررہے تھے۔

بلاول بھٹو زرداری کا کہنا تھا کہ آزاد کشمیر کے ڈاکٹرز مطالبہ کررہے تھے کہ انہیں دیگر پاکستان کے ڈاکٹرز کی طرز کی طبی سہولیات دی جائیں، ہم آزاد کشمیر کے ڈاکٹرز پر حملے کی مذمت کرتے ہیں۔

چیئرمین پیپلز پارٹی بلاول بھٹو زرداری کا مزید کہنا تھا کہ پورے پاکستان کے ڈاکٹرز کو سندھ کی طرز کا رسک الاؤنس دیا جائے اور ہماری زندگیوں کو بچانے کے لئے اپنی زندگیاں خطرے میں ڈالنے والے طبی عملے کو سہولیات مہیا کی جائیں۔

سندھ جلد ڈاکٹروں کی سیکیورٹی کے لئے بھی قانون سازی کرے گا، بلاول بھٹو زرداری

واضح رہے اس سے قبل چیئرمین پی پی پی بلاول بھٹو زرداری کی سربراہی میں ینگ ڈاکٹرز ایسوسی ایشنز کے نمائندگان کے الگ الگ ویڈیو لنک اجلاس منعقد کیا گیا۔

 بلاول بھٹو کا کہنا تھا کہ طبی آلات مانگنے پر حکومتوں نے ڈاکٹروں سے مجرموں کی طرح کا سلوک کیا گیا جبکہ ہونا تو یہ چاہئیے تھا کہ وفاقی حکومت کورونا وائرس کے حوالے سے ڈاکٹرز سے مشاورت کرتی مگر انہیں گرفتار کیا گیا۔

انہوں نے کہا تھا کہ اس بات کو سمجھنے کی ضرورت ہے کہ ڈاکٹرز مجرم نہیں ہیں بلکہ ہمارے مسیحا ہیں، اپنی زندگیاں داؤ پر لگاکر ہماری زندگیاں بچانے والے ڈاکٹرز کو لاوارث چھوڑنا سفاکیت کی انتہا ہے جبکہ عام دنوں اور خصوصی طور پر وباء کے دنوں میں ڈاکٹرز ہمارے فرنٹ لائن کے سپاہی ہیں۔

چیئرمین پیپلز پارٹی بلاول بھٹو زرداری نے کہا تھا کہ عمران خان کو شرم آنی چاہئیے کہ اپنے اعلان کے باوجود انہوں نے ایک بار بھی ڈاکٹرز سے مشاورت نہیں کی، یہ کیسے حکمران ہیں کہ ڈاکٹرز کے بجائے غیرمتعلقہ لوگوں سے پوچھ رہے ہیں کہ وباء سے کیسے نمٹا جائے۔