کراچی۔ ڈی جی رینجرز سندھ میجرجنرل عمر احمد بخاری نے سینٹرل پولیس آفس کراچی کا دورہ کیا ہے۔

سینٹرل پولیس آفس میں آمد پرآئی جی سندھ مشتاق احمد مہر کی جانب سے ڈی جی رینجرز سندھ میجرجنرل عمر احمد بخاری کا استقبال کیا گیا۔

ڈی جی رینجرز سندھ نے یادگار شہداء پر حاضری دی اور شہدائے سندھ پولیس کے لئے فاتحہ خوانی بھی کی اور پھول چڑھائے۔

آئی جی سندھ سے ملاقات کے دوران ڈی جی رینجرز سندھ نے پاکستان اسٹاک ایکسچینج پر دہشت گردانہ حملے کے دوران پولیس ٹیم میں شامل غازیوں کی جواں مردی، جرأت اور بہادری کو خراج تحسین بھی پیش کیا۔

ڈی جی رینجرز کی جانب سے دہشتگردی کے واقعہ میں شہید پولیس افسر کی خدمات کو خراج عقیدت پیش کرتے ہوئے تعزیت بھی کی گئی۔

صدر مملکت کی شہدائے کارگل کو شاندار خراج عقیدت

اس موقع پر ڈی جی رینجرز نے اپنے محکمے کی جانب سے مستقبل میں بھی سندھ پولیس کے ساتھ تعاون کو جاری رکھنے کا اعادہ کیا ہے اور کہا ہے کہ جرائم کےخلاف رینجرز سندھ پولیس کے ساتھ کھڑی ہے اور ہمہ وقت مستعد اورچوکنا رہتے ہوئے پولیس کے شانہ بہ شانہ سیکیورٹی کے مجموعی اقدامات کو مذید ٹھوس اور غیر معمولی بنائیگی۔

آئی جی سندھ کی جانب سے سی پی او آمد پر ڈی جی رینجرز سندھ کا شکریہ ادا کیا گیا اور بتایا گیا کہ جرائم کے خلاف یقینی کامیابی کا انحصار پولیس، رینجرز اور سیکیورٹی کے دیگر اداروں کے مابین نا صرف بہترین اور مؤثر روابط پر ہے بلکہ معلومات کے تبادلوں اور ان معلومات کو بروقت فالو کرکے منظم اور مشترکہ ایکشن پر بھی ہے۔