آرمی چیف جنرل قمر جاوید باجوہ اور وزیراعظم عمران خان سمیت دیگر اہم شخصیات نے شیخوپورہ ٹرین حادثے پر انتہائی افسوس کا اظہار کیا ہے۔

پاک فوج کےشعبہ تعلقات عامہ (آئی ایس پی آر) کے مطابق آرمی چیف جنرل قمرجاوید باجوہ نے شیخوپورہ کے قریب افسوسناک ٹرین حادثے میں قیمتی جانوں کے نقصان پر اظہار افسوس کیا ہے۔

آرمی چیف جنرل قمرجاوید باجوہ نے کہا کہ غمزدہ خاندانوں کے ساتھ اظہار تعزیت کرتا ہوں اور زخمیوں کی جلد صحتیابی کے لیئے دعا گو ہوں۔

 دوسری جانب سماجی رابطے کی ویب سائٹ ٹویٹر پروزیراعظم عمران خان نے شیخوپورہ ٹرین حادثے پر انتہائی افسوس کا اظہار کرتے ہوئے کہا کہ مرنے والوں کے اہلخانہ کے غم میں برابر کا شریک ہوں، میری دعائیں اور ہمدردیاں جاں بحق افراد کے اہل خانہ کیساتھ ہیں۔

اپنے پیغام میں عمران خان نے زخمیوں کے بہترین علاج معالجے کی ہدایت کرتے ہوئے کہا کہ حادثے میں کم از کم 20 افراد دم توڑ گئے۔ زیادہ تر سکھ یاتری ننکانہ صاحب سے واپس جارہے تھے۔

آج سہ پہر شیخوپورہ کے نزدیک ریلوے پھاٹک پر رونما ہونے والے المناک حادثے، جس کے نتیجے میں 20 افراد جن میں بیشتر ننکانہ صاحب سے واپس لوٹنے والےسکھ زائرین تھے، کے جاں بحق ہونے پر نہایت رنجیدہ اور مغموم ہوں اور زخمیوں کے بہترین علاج و نگہداشت کیلئےحکام کو ہدایات دے چکا ہوں۔

— Imran Khan (@ImranKhanPTI) July 3, 2020

وزیراعظم نے حکام کو تمام خاندانوں کو سہولیات اور دیکھ بھال یقینی بنانے کی ہدایت کرتے ہوئے کہا کہ ریلوے کے آپریشنل سیفٹی ایس او پیز کا فوری جائزہ لیا جائے گا۔

شیخوپورہ کے قریب ٹرین کو حادثہ،19 سکھ یاتری ہلاک

اس موقع پر معاون خصوصی وزیراعظم عاصم سلیم باجوہ نے بھی ٹرین حادثے پر اظہار افسوس کرتے ہوئے کہا کہ شیخو پورہ کے قریب ایکسپریس ٹرین کے سکھ کمیونٹی کی بس سے افسوسناک تصادم میں 19 قیمتی جانیں ضائع ہوئیں۔

اپنے پیغام میں عاصم سلیم باجوہ نے کہا کہ غنزدہ خاندانوں کے ساتھ تعزیت کا اظہار کرتے ہیں اور زخمیوں کی جلد صحتیابی کے لیئے دعاگو ہیں۔

Tragic accident resulting into loss of 19 precious lives when Express train rammed into bus of Sikh Community near Sheikhupura.Our Condolences to families/prayers for injured.ML-1 will ensure more safety by replacing Railway crossings with underpasses/overhead bridges

— Asim Saleem Bajwa (@AsimSBajwa) July 3, 2020

معاون خصوصی وزیراعظم عاصم سلیم باجوہ نے مزید کہا کہ ایم ایل ون منصوبہ میں ریلوے کراسنگز کو انڈر پاسز اور اوور ہیڈ بریجز میں تبدیل کیا جائے گا جبکہ ایم ایل ون منصوبے سے ریلوے کراسنگز حادثات کی روک تھام ممکن ہو گی۔

دریں اثنا صدر مملکت ڈاکٹر عارف علوی نے شیخوپورہ میں ٹرین حادثے پر افسوس اور حادثہ میں قیمتی جانوں کے ضیاع پر گہرے دکھ کا اظہار کرتے ہوئے کہا کہ زخمیوں کو علاج معالجہ کی بہترین سہولیات فراہم کی جائیں۔

اس عرصے میں وزیر خارجہ مخدوم شاہ محمود قریشی نے شیخوپورہ میں ٹرین حادثے پر افسوس کا اظہار کرتے ہوئے کہا کہ سکھ برادری کے ساتھ پیش آنے والے اس حادثہ کی خبر پر دل گرفتہ ہوں۔

وزیر خارجہ نے قیمتی جانوں کے ضیاع پر گہرے دکھ اور افسوس کا اظہار کیا اور زخمیوں کی جلد صحت یابی کیلئے دعا کی۔

یاد رہے کراچی سے لاہور جانے والی شاہ حسین ایکسپریس  شیخوپورہ  کے قریب حادثے کا شکا ہوگئی تھی ، مسافروں سے بھری ویگن ٹرین سے ٹکرانے کے نتیجے میں 19 سکھ یاتری ہلاک ہوگئے تھے۔