معاون خصوصی برائے سیاسی روابط ڈاکٹر شہباز گل کا کہنا ہے کہ اس سے بڑا لطیفہ اور ڈھٹائی کیا ہو گی کہ پسر زرداری کرپشن پر بات کریں۔

چیئر مین پیپلز پارٹی بلاول بھٹو زرداری کی پریس کانفرنس پر ردعمل دیتے ہوئے معاون خصوصی برائے سیاسی روابط ڈاکٹر شہباز گل  کا کہنا تھا کہ  خوامخواہ بھٹو  پرچی چیئرمین کو لیڈر ظاہر کرنے کے لیے روزانہ ایک پریس کانفرنس رٹا کر پڑھائی جاتی ہے۔

شہباز گل نے بلاول بھٹو کو کہا کہ لیڈرشپ موروثی نہیں ہوتی یہ ایک خداداد صلاحیت  ہے اور آپ میں یہ سہولت موجود نہیں ہے۔

انہوں نے مزید کہا کہ کرپشن پر کوئی وہ شخص بات کرے جس کی کوئی رتی برابر تو کریڈیبلٹی ہو۔ انہیں شرم بھی نہیں آتی جب کرپشن کا لفظ منہ سے نکالتے ہیں۔

معاون خصوصی برائے سیاسی روابط نے کہا کہ ہاتھ ملانے کے بعد اپنی انگلیاں گن لیں، انٹرنیشنل میڈیانے کس عظیم شخصیت کے بارے میں یہ لکھا؟ جی ہاں سرے محل، سوئس اکاونٹس، مسٹر ٹین پرسنٹ جعلی اکاؤنٹس، اومنی،زرداری صاحب کی وجہ شہرت ہیں۔

شہباز گل نے کہا کہ  پسر زرداری! آپ الٹے بھی لٹک جائیں، عمران خان کو کرپٹ ثابت نہیں کر سکتے۔ حالات یہ ہیں کہ کرپشن  میں لفظ  زرداری کرپشن کا استعارہ بن چکا ہے۔

ان کا کہنا تھا کہ  کوئی بعید نہیں مستقبل کی ڈکشنریوں میں کرپشن لفظ کی اگلی فارم   زرداری  ملے آنے والی نسلوں کو ۔