وزیرخارجہ شاہ محمود قریشی نے کہا ہے کہ کو کلچر کے حوالے سے اللہ تعالیٰ نے بہت نوازا ہے۔

تفصیلات کے مطابق وزیر خارجہ شاہ محمود قریشی کی زیر صدارت وزارت خارجہ میں آرٹس اینڈ کلچر گروپ کا افتتاحی اجلاس منعقد ہوا جس میں پارلیمانی سیکرٹری خارجہ عندلیب عباس، آرٹ اینڈ کلچر گروپ کے ممبران اور وزارت خارجہ کے سینیئر افسران نے شرکت کی۔

 اجلاس سے خطاب میں وزیر خارجہ نے کہا کہ پاکستان کے مثبت تشخص کو اجاگر کرنے کیلئے کلچرل ڈپلومیسی انتہائی اہمیت کی حامل ہے۔

شاہ محمود قریشی نے یہ بھی کہا کہ ہمارے پاس جہاں خوبصورت تاریخی اور تفریحی مقامات ہیں وہاں عالمی شہرت یافتہ فنکار بھی موجود ہیں جبکہ گذشتہ ایک سال میں پاکستان کے امیج میں بہت بہتری آئی ہے جمہوری اداروں کو فروغ ملا ہے

سمارٹ لاک ڈاون کے بعد پاکستان میں کورونا کی عالمی وبا میں کمی آرہی ہے، وزیرخارجہ

وزیر خارجہ کا کہنا تھا کہ ہم نے سیاحت کو کھولا، ای ویزہ کی سہولت متعارف کروائی جس پر دنیا بھر میں ہمیں پذیرائی ملی جبکہ الحمداللہ پاکستان آنے والے ہر سیاح نے واپس جا کر پاکستان کے حوالے سے بہترین تصویر کشی کی ۔

شاہ محمود قریشی کا مزید کہنا تھا کہ پبلک ڈپلومیسی کے تحت ہم کلچرل ڈپلومیسی، ڈیجیٹل ڈپلومیسی ،سپورٹس ڈپلومیسی کو متعارف کروا رہے ہیں ہم جلد ڈپلومیٹک کور کو بھی وزارت خارجہ میں مدعو کر کے کلچرل ڈپلومیسی کے حوالے سے خصوصی بریفنگ دیں گے

اجلاس میں وزیرخارجہ شاہ محمود قریشی نے شرکاء کی شرکت اور قیمتی تجاویز پر ان کا شکریہ ادا کیا۔