مانسہرہ: وزیراعلی محمود خان نے شوگران میں سیاحتی مقامات تک سڑکوں کی تعمیر کے تین مختلف  منصوبوں کا افتتاح کیا۔

اس موقع پر وزیراعلیٰ کے پی محمود خان نے کہا کہ سیاحتی مقامات تک سڑکوں کی تعمیر سے علاقے میں سیاحت کو فروغ ملے گا اور مقامی لوگوں کو روزگار کے مواقع میسر آئیں گے۔

انہوں نے کہا کہ صوبائی حکومت وزیر اعظم عمران کے وژن کے مطابق سیاحت کے فروغ کے لئے مربوط حکمت عملی کے تحت اقدامات اٹھا رہی ہے۔

انہوں نے بتایا کہ نئے بجٹ میں  ہزارہ کے مختلف سیاحتی مقامات تک سڑکوں کی تعمیر کے لئے 2400 ملین روپے کی رقم مختص کی گئی ہے اور ہزارہ ڈویژن میں سیاحت کو فروغ دے کر علاقے کی تقدیر بدل دیں گے کیونکہ صوبے میں سیاحت کے فروغ کے لئے ٹوارزم اتھارٹی کا قیام عمل میں لایا گیا ہے۔

انہوں نے بتایا کہ سیاحت کے شعبے کو کھولنے کے لئے ایس او پیز تیار کئے گئے ہیں، عید الاضحی کے بعد وفاق اور دیگر صوبوں کی مشاورت سے سیاحت کے شعبے کو کھولنے پر کام کر رہے ہیں۔

محمود خان نے کہا کہ کورونا کی مشکل صورتحال کے باوجود صوبے میں ترقی کا سفر جاری رکھیں گے کیونکہ کورونا صورتحال سے دیگر شعبوں کی طرح  سیاحت کا شعبہ بھی بری طرح متاثر ہوا ہے۔

یاد رہے کہ وزیراعلیٰ محمود خان نے جن سڑکوں کا افتتاح کیا ہے ان سڑکوں میں شوگران، گھنول پابرنگ اور  مانور ویلی روڈز شامل ہیں جبکہ ان سڑکوں کی مجموعی لمبائی 35 کلومیٹر ہے اور ان سڑکوں کی تعمیر پر 14 کروڑ سے زائد کی لاگت آئے گی۔