وزیر اعلیٰ سندھ مراد علی شاہ کا کہنا ہے کہ  کورونا وائرس کی وباء کو کنڑول کرنے میں این سی او سی نے اہم کردار ادا کیا  ہے۔

تفصیلات کے مطابق نیشنل وفاقی وزیر اسد عمر کی زیر صدارت کمانڈ آپریشن کنٹرول (این سی او سی)  کا خصوصی اجلاس وزیر اعلیٰ ہاؤس سندھ میں منعقد ہوا۔

وزیر اعلیٰ سندھ  مراد علی شاہ نے اجلاس میں بطورمیزبان خصوصی شرکت کی۔سندھ کی وزیر صحت، وزیر تعلیم اور انتظامیہ کے دیگر لوگوں  نے بھی اجلاس میں شرکت کی۔

وفاقی وزیر داخلہ اسلام آباد سے ویڈیو لِنک کے ذریعے  اجلاس میں شریک ہوئے۔

ان کے علاوہ لیفٹننٹ جنرل حمود الزمان خان ،نیشنل کوآرڈی نیٹر  این سی او سی ڈاکٹر فیصل سلطان، مِس تانیہ ایدرس اور میجر جنرل آصف  گورایا، ڈی جی آپریشنل اینڈ پلان بھی اجلاس میں شریک ہوئے۔

اجلاس میں تمام صوبوں، آزادجموں و کشمیر اور گلگت بلتستان کے نمائندے  بھی شریک ہوئے۔

وزیر اعلیٰ سندھ مراد علی شاہ نے این سی او سی  کی مرکزی ٹیم کو سندھ میں خوش آمدید کہا۔

مراد علی شاہ نے کہا کہ این سی او سی  کے اس طرح کے اجلاس وبا ءکے پھیلاؤ کو روکنے میں صوبوں کے لیے انتہائی مدد گار ثابت ہوں گے۔ صوبائی دارلحکومتوں میں اجلاس کا انعقاداین سی او سی کا بہت زبردست فیصلہ ہے۔

انہوں نے کہا کہ کورونا وبا ءکو کنڑول کرنے میں این سی او سی نے بہت اہم کردار ادا کیا ہے۔شروع میں کچھ مشکلات درپیش تھیں لیکن وفاق اور صوبوں نے مِل کر عوام کی صحت کے لیے بھرپور کام کیا۔

وزیر اعلیٰ سندھ نے کہا کہ  اس وقت اسپتالوں میں اور دیگر جگہوں پر انتظامات بہتر ہیں۔ ہمیں آنے والے دنوں میں عیدالاضحیٰ، محرم اور ربیع الاول کے حوالے سے خصوصی تیاری کرنا ہو گی۔

وفاقی وزیر اسد عمر نے کہا کہ عیدالاضحیٰ کے دوران مویشی منڈیوں میں احتیاطی تدابیر کے ساتھ مانیٹرنگ کا نظام بھی ضروری ہے۔ فیس ماسک او ر احتیاطی تدابیر کو ہر صورت یقینی بنانا ہو گا۔

اسد عمر نے مزید کہا کہ این سی او سی کے صوبائی دارلحکومتوں میں اجلاس کے مقاصد اہم ایشوز پر مشاورت اور صوبوں کی کارکردگی کو سراہنا ہے۔

انہوں نے کہا کہ اگر چہ کورونا مثبت کیسز میں اور اموات میں کمی واقع ہو ئی ہے لیکن ہمیں احتیاط کا دامن نہیں چھوڑنا۔ہمیں اب پہلے سے زیادہ احتیاط کی ضرورت ہے تاکہ دوبارہ کیسزکی تعداد میں اضافہ نہ ہو۔

وفاقی وزیر کا کہنا تھا کہ  سندھ سمیت تمام صوبوں میں ڈاکٹرز،  پیرا میڈکس انتظامیہ او ر قانون نافذ کرنے والے اداروں نے زبردست کام کیا ہے،یہ سب شاباش کے مستحق ہیں۔

اس موقع پر وزیر داخلہ نے کہا کہ غیر قانونی مویشی منڈیوں کے خلاف کریک ڈاؤن جاری ہے۔ مویشی منڈیوں میں احتیاطی تدابیر کو ہر صورت یقینی بنایا جائے گا۔

وزیر داخلہ نے کہا کہ  مویشی منڈیوں میں کنٹرول کا نظام موثر بنایا جائے گا تاکہ وبا ءکے پھیلاؤ کو روکنے سے بچایا جا سکے۔مویشی منڈیوں اور عیدا لاضحیٰ کے حوالے سے ہدایات جاری کر دی گئیں ہیں۔

وزیرداخلہ نے مزید کہا کہ   محرم کے حوالے سے بھی پلان مرتب کر رہے ہیں۔ محرم کے حوالے سے حفاظتی تدابیر پر مشاورت جاری ہے۔