ترجمان کے الیکٹرک نے کہا ہے کہ شہری ٹوٹے ہوئے تاروں، بجلی کے کھمبوں اور پی ایم ٹیز سے دور رہیں۔

تفصیلات کے مطابق کراچی میں بجلی فراہم کرنے والی نجی کمپنی کے الیکٹرک کے ترجمان نے وارننگ جاری کی ہے کہ بارش اور کھڑے پانی میں پانی کی موٹر جیسے برقی آلات کا غیر محفوظ استعمال حادثات کا سبب بن سکتا ہے۔

ترجمان کے الیکٹرک نے کہا کہ بارشوں سے قبل کے-الیکٹرک نے سسٹم کی بہتری کے لیے خاطر خواہ اقدامات کیے ہیں، ان اقدامات میں ارتھنگ، اور گراؤنڈنگ کے ساتھ، ایچ ٹی اور ایل ٹی پولز کی جیو ٹیگنگ جیسے اقدامات بھی شامل ہیں۔

ترجمان نے یہ بھی کہا کہ بارشوں سے قبل ان تمام اقدامات کا مقصد کے-الیکٹرک کے سسٹم کو مزید بہتر بنانا ہے جبکہ الیکٹرک کی موبائل ٹیمیں بجلی سے متعلق بروقت امداد اقدامات کے لیے ہمہ وقت مصروف ہیں۔

ترجمان کے الیکٹرک کا کہنا تھاکہ انسانی جانوں کا تحفظ اولین ترجیح رہی ہے، شہری حکومت و متعلقہ اداروں سے امید ہے کہ بارش کی صورت میں پانی کی فی الفور نکاسی کی جائیگی۔

کراچی میں کے الیکٹرک انتظامیہ کی ہٹ دھرمی برقرار

اپنے بیان میں ترجمان کے الیکٹرک کا یہ بھی کہنا تھا کہ بارش کی صورت میں احتیاط کریں، غیر قانونی ذرائع سے بجلی کا حصول جان لیوا  ہے۔

ترجمان کے الیکٹرک کا مزیدد کہنا تھاکہ بارش سے قبل یا دوران صارفین کسی بھی شکایت کی صورت میں 118 کال سینٹر یا سوشل میڈیا پلیٹ فارمز پر فوری رابطہ کریں۔