وزیراعلیٰ پنجاب نے ضلعی انتظامیہ کو روٹی اور نان کی قیمتیں مقرر شدہ داموں سے مہنگی فروخت کرنے والوں کے خلاف کاروائی کا حکم دے دیا۔

تفصیلات کے مطابق وزیراعلیٰ پنجاب سردارعثمان بزدار نے روٹی اور نان کی قیمت میں اضافے کا نوٹس لیتے ہوئے پرائس کنٹرول کمیٹی اور انتظامیہ کو فوری کارروائی کاروائی کا حکم بھی دے دیا۔

عثمان بزدار نے ہدایت کی کہ روٹی اورنان کی مقررکردہ قیمت پردستیابی یقینی بنائی جائے جبکہ روٹی اورنان کی قیمت میں بلاجواز اضافے پر قانون کےتحت کارروائی کی جائے اور پرائس کنٹرول کمیٹی اورانتظامیہ ضروری اقدام اٹھائے۔

وزیراعلیٰ پنجاب سردارعثمان بزدار نے مزید کہا کہ روٹی اورنان کی قیمت میں خودساختہ اضافہ برداشت نہیں کیاجائےگا۔

لاہور ، روٹی اور نان کی قیمتوں میں اضافہ

یاد رہے گزشتہ روز لاہور میں تندور مالکان نے آٹے کی قیمت میں اضافے کے باعث روٹی اور نان کی قیمتیں بڑھا دیں گئی تھی۔

صدر تندور ایسوسی ایشن آفتاب گل نے روٹی اور نان کی نئی قیمتوں کا نوٹیفیکیشن جاری کردیا تھا جس کے تحت سادہ روٹی کی قیمت 8 روپے جبکہ خمیری روٹی اور نان کی قیمت 12 روپے مقرر کی گئی ہے ۔

دوسری جانب فلور ملز مالکان نے بھی آٹے کا تھیلا 850 روپے میں فروخت کرنے سے انکار کر دیا تھا ۔

چیئرمین پاکستان فلور ملز عاصم رضا کا کہنا تھا کہ ہمیں گندم اجرا کی سرکاری پالیسی منظور نہیں، ہم بازار سے مہنگی گندم خریدنے پر مجبور ہیں۔

 عاصم رضا  کا مزید کہنا تھا  کہ  20 کلو آٹے کے تھیلے کی قیمت 1030 روپے ہی ہوگی، قیمت کم نہیں کر سکتے کیونکہ محکمہ خوراک نے کوئی وعدہ پورا نہیں کیا۔