وزیرخارجہ شاہ محمود قریشی نے کہا ہے کہ پاکستان نے کورونا وبا پر قابو پانے کیلئے 8ارب ڈالر کا پیکج دیا ہے۔

تفصیلات کے مطابق وزیرخارجہ شاہ محمود قریشی نے اقوام متحدہ اکنامک اینڈ سوشل کونسل اجلاس سے خطاب کرتے ہوئے کہا کہ کورونا وائرس نے دنیا بھر کی معیشتوں کو شدید متاثر کیا۔

اپنے بیان میں وزیرخارجہ نے کہا کہ وزیراعظم عمران خان نے بھی ترقی پزیر ملکوں کے واجب الادا قرضوں میں نرمی کا مطالبہ کیا ہے۔

شاہ محمود قریشی کا کہنا تھا کہ کورونا وبا سے نمٹنے کے لیے مشترکہ عالمی حکمت عملی کی ضرورت ہے۔

وزیرخارجہ شاہ محمود قریشی کا یہ بھی کہنا تھا کہ پاکستان کو مقبوضہ کشمیر کے عوام کےخلاف بھارتی جبر وستم پر تشویش ہے، یہ وقت مذہبی اقلیتوں پر ظلم وجبر اور ان کے حقوق غصب کرنے کا نہیں۔

پاکستان اور چین نے ہر مشکل وقت میں ایک دوسرے کا ساتھ دیا ، وزیرخارجہ

واضح رہے اس سے قبل وزیرخارجہ مخدوم شاہ محمود قریشی کا چین کے وزیر خارجہ وانگ ژی کے ساتھ ٹیلیفونک رابطہ ہوا جس میں دو طرفہ، علاقائی و اہم عالمی امور پر تبادلہ خیال کیا تھا۔

وزیرخارجہ نے اپنے چینی ہم منصب کو بھارت کی جانب سے مقبوضہ جموں و کشمیر میں جاری انسانی حقوق کی مسلسل خلاف ورزیوں سے آگاہ کیا جبکہ دونوں وزرائے خارجہ نے افغانستان میں قیام امن کیلئے مشترکہ کاوشیں جاری رکھنے پر  اتفاق کرتے ہوئے اگلے پاک چین افغان سہ ملکی وزرائے خارجہ مذاکرات کے جلد انعقاد کی ضرورت پر زور دیا تھا۔