سندھ میں جعلی ڈومیسائل اور پی آر سیز کا معاملے پر حکومت سندھ نے تحقیقات کے لئے ڈویژنل سطح پر کمیٹیاں تشکیل دیدیں۔

تفصیلات کے مطابق حکومت سندھ نے تحقیقات کے لئے ڈویژنل سطح پر کمیٹیاں تشکیل دیدیں، محکمہ داخلہ نے کمیٹیوں کی تشکیل کا نوٹیفیکشن جاری کردیا۔

نوٹیفیکشن کے مطابق ہر ڈویژن میں متعلقہ کمشنر کمیٹی کا سربراہ ہوگا جبکہ کمیٹی میں ایڈیشنل کمشنر اور انیس گریڈ کی سطح کا افسر شامل ہوگا۔

نوٹیفیکشن میں کہا گیا ہے کہ کمیٹی پچھلے دس سال میں جاری کئے گئے ڈومیسائل اور پی آر سیز کا ریکارڈ چیک کریگی۔

نوٹیفیکشن میں مزید کہا گیا کہ کمیٹی مشکوک ڈومیسائل اور پی آر سیز کی نشاندہی کریگی جبکہ کمیٹی تیس روز میں انکوائری مکمل کریگی۔

یاد رہے وزیراعلی سندھ نے گزشتہ دس سال کے دوران جاری ڈومیسائل اور پی آر سی سرٹییفکیٹ کی تحقیقات کا حکم دیا تھا

سندھ میں جعلی ڈومیسائل پر نوکریاں بیچی گئیں، کنور نوید

واضح رہے کہ اس قبل وزیرِ اطلاعات سندھ ناصر حسین شاہ نے کہا تھا کہ وزیرِ اعلیٰ سندھ سیّد مراد علی شاہ نے جعلی ڈومیسائل کے خلاف کمیٹی بنا دی ہے جبکہ ذمہ داروں کے خلاف سخت ایکشن لیا جائے گا۔

وزیرِ اطلاعات سندھ نے کہا تھا کہ سندھ حکومت نے  جعلی ڈومیسائل پر وفاق سے ڈیٹا طلب کیا ہے۔ وزیرِ اعلیٰ سندھ مراد علی شاہ نے جعلی ڈومیسائل کے معاملے پر کمیٹی بنا دی ہے۔ ہم کسی کے ساتھ زیادتی اور حق تلفی نہیں ہونے دیں گے اور قانون کے تقاضوں کے مطابق کارروائی کی جائے گی۔

ناصر حسین شاہ نے مزید کہا تھا کہ صرف جعلی ڈومیسائل والوں کے خلاف ایکشن لیا جائے گا اور قانون کے مطابق انہیں سزا بھی دی جائے گی ۔ کراچی سمیت سندھ کے دیگر اضلاع میں بھی ڈومیسائل کی اسکروٹنی کی جارہی ہے تاکہ یہ پتہ چل سکے کہ اس اسکینڈل میں کون کون ملوث ہے۔