پاکستان پیپلز پارٹی کے رکن قومی اسمبلی قادر پٹیل نے کہا کہ صرف اتنا بتادیں کہ مراد سعید میں آخر کونسی اہلیت ہے کہ عمران خان نے انہیں ایم این اے بنوایا ہے۔

پاکستان پیپلز پارٹی کے رکن قومی اسمبلی قادر پٹیل نے مراد سعید کی پریس کانفرنس پر ردعمل کا اظہار کرتے ہوئے کہا ہے کہ عمران خان، مراد سعید کے پیچھے چھپنے کی بجائے خود سامنے آئیں۔

پاکستان پیپلز پارٹی کے رکن قومی اسمبلی نے کہا کہ عمران خان اپنی چینی چوری اور آٹا چوری پکڑے جانے پر مراد سعید کو دوسروں پر الزام تراشی کے لئے آگے کر رہے ہیں جبکہ صرف نہ بتادیں کہ مراد سعید میں آخر کونسی اہلیت ہے کہ عمران خان نے انہیں ایم این اے بنوایا ہے۔

اپوزیشن کے پاس نہ دلیل ہے نہ دلائل سننے کی ہمت، مراد سعید

انہوں نے کہا کہ مراد سعید بتائیں کہ وہ 200 ارب ڈالر کہاں ہیں جن کا انتخابات سے قبل انہوں نے انکشاف کیا تھا؟ اگر مراد سعید نے 200 ارب ڈالر کا نہیں بتایا تو تلاشی دینے کے لئے تیار رہیں کیونکہ میں خود ان کی تلاشی لوں گا۔

قادر پٹیل نے مزید کہا ہے کہ جعلی ڈگری والے مراد سعید میرے چیلنج سے گھبرا گئے ہیں لیکن ایک دن میں تین پرچے دینے والے مراد سعید ہمت کریں اور میرے سامنے آئیں۔

انہوں نے کہا کہ سابق صدر زرداری پر مقدمات کی بات کرنے والے مراد سعید اپنے والد کے آسٹریلیا میں جعلی سٹیزن ویزے پر گرفتاری کا بھی بتائیں۔

واضح رہے کہ اس سے قبل وفاقی وزیر مراد سعید کا کہنا ہے کہ اپوزیشن کے پاس نہ  ہی دلیل ہے  اور نہ  ہی دلائل سننے کی ہمت ہے۔

قومی اسمبلی کے اجلاس کے بعد پریس کانفرنس کرتے ہوئے وفاقی وزیر مراد سعید کاکہنا تھا کہ   اپوزیشن کی جانب سے بڑھکیں ماری جاتی ہیں۔ ہم بھی جواب دینے کی کوشش کرتے ہیں یہ نو دو گیارہ ہوجاتے ہیں۔

وفاقی وزیر نےکہا کہ  بلاول کے کورم کی نشاندہی کے بعد سب فرار ہوگئے۔انہیں گراس روٹ لیول کا علم  ہی نہیں ،یہ ٹوئیٹر ٹوئیٹر کھیلتے ہیں۔ پرچی کی بنیاد پر سیاست کرنے والے راہ فرار اختیار کررہے ہیں۔