وزیراطلاعات پنجاب فیاض الحسن چوہان کا کہنا ہے کہ  آل پاکستان لوٹ مار ایسوسی ایشن کو بے نقاب کرنا میرا اخلاقی، سیاسی اور قانونی فرض ہے۔

تفصیلات کے مطابق فیاض الحسن چوہان نے کہا کہ  خصوصاً کرپٹوں کے سرغنہ شہباز شریف کی بے لوث اور بے خوف کرپشن اور نااہلی کو سامنے لانا میری اولین ترجیح ہے۔

وزیراطلاعات پنجاب کا کہنا تھا کہ  ن لیگی ترجمان میرے الزامات، بیانات اور انکشافات کا بروقت جواب دینے کی کوشش کیا کریں۔  ن لیگی ترجمانوں کا جواب ایک دن بعد شہباز شریف سے ڈانٹ کھانے کے بعد آتا ہے۔

فیاض الحسن چوہان نے کہا کہ  وزیراعلیٰ پنجاب سردار عثمان بزدار کی شبانہ روز محنت کے نتائج سامنے آ رہے ہیں۔  پنجاب میں دیگر صوبوں کے مقابلے میں کوروناکے تدارک کے بہتر نتائج سردار عثمان بزدار کی قیادت کی بدولت ممکن ہوا۔

انہوں نے مزید کہا کہ  پنجاب میں اسمارٹ لاک ڈاؤن سے کورونا کیسز میں واضح کمی دیکھنے میں آئی ہے۔

وزیر اطلاعات پنجاب نے کہا کہ سیاسی مخالفین کے شدید منفی پراپیگنڈے کے باوجود بزدار حکومت کے اتحادی ساتھ کھڑے ہیں۔  سیاسی، انتظامی و عوامی امور کو ساتھ لے کر چلنا سردار عثمان بزدار کا طرہ امتیاز ہے۔

فیاض الحسن چوہان  کا کہنا تھا کہ ممکنہ سیلاب سے نمٹنے کے لیے وزیر اعلیٰ پنجاب صوبے کے مختلف اضلاع کے دورے کر رہے ہیں۔ گذشتہ ادوار میں نام نہاد خادم اعلیٰ سیلاب آنے کے بعد فوٹو سیشن کے لیے پانی میں جا کھڑے ہوتے تھے۔

انہوں نے کہا کہ  آج سالوں بعد پنجاب کی نہریں ٹیلز تک چھوٹے کاشتکاروں کی فصلوں کو سیراب کر رہی ہیں۔ بزدار حکومت کی گندم پر ٹارگٹڈ سبسڈی امیر کے مقابلے میں غریب عوام کو بہتر فائدہ دے گی۔