وفاقی کابینہ  کے اجلاس میں  اقتصادی رابطہ کمیٹی کے فیصلوں کی توثیق کا معاملہ موخر کر دیا  گیا ۔

تفصیلات کے مطابق وزیر اعظم عمران خان کی زیر صدارت  وفاقی کابینہ  کا اجلاس  ہوا  جس  میں  اقتصادی رابطہ کمیٹی کے فیصلوں کی توثیق  ہونا تھی۔

ذرائع کا کہنا ہے کہ وفاقی کابینہ کو کے الیکٹرک کے نرخ اور دیگر معاملات پر بریفنگ دی گئی۔ کابینہ کے الیکٹرک کے بجلی کے نرخوں پر متفق نہ ہو سکی۔

ذرائع  کا مزید کہنا  تھا کہ وفاقی کابینہ  نے اقتصادی رابطہ کمیٹی کے فیصلوں کی توثیق کا معاملہ موخر کر دیا   ہے۔

ای سی سی نے 3 جولائی کو ایل این جی کی قیمتوں میں اضافے سمیت اہم فیصلے  کیےتھے۔

ای سی سی نے گھریلو و کمرشل صارفین پر 73 ارب روپے کا بوجھ ڈالنے کی منظوری دی تھی جسے کابینہ نے روک دیا ہے۔

ذرائع کا کہنا ہے کہ  وزیراعظم عمران خان  نے کے الیکٹرک اور ایل این جی کے معاملے پر رواں ہفتے اہم اجلاس بلانے کا فیصلہ کیا ہے۔

اس کے علاوہ اجلاس میں عید پر بازار، مارکیٹس اور   ریسٹورنٹس کھولنے پر بھی غور کیا گیا۔وفاقی وزیر ریلویز شیخ رشید نے عید سے پہلے مارکیٹس، ریسٹورنٹس اور ہوٹلز کھولنے کی حمایت کر دی۔

شیخ رشید نے کہا کہ  وزیراعظم صاحب ہوٹل اور ریسٹورنٹس کھول دیں نہیں تو لوگ بھوکے مر جائیں گے۔اس وقت مارکیٹس کھولنا بھی مناسب ہوگا۔

وزیراعظم نے ہوٹل اورریسٹورنٹس کھولنے کا معاملہ اسد عمر کے سپرد کر تے ہوئے کہا کہ ہوٹلز ،ریسٹورنٹس اور مارکیٹس کے معاملے کو آپ سنجیدگی سے دیکھیں۔

ذرائع کا کہنا ہے کہ  وفاقی وزیر علی زیدی نے عزیر بلوچ جے آئی ٹی کا معاملہ بھی کابینہ میں اٹھا یا۔ علی زیدی نے  جے آئی ٹی کے معاملے پرکابینہ کو بریفنگ دی۔