وزیرخارجہ شاہ محمود قریشی نے کہا ہے کہ وزیراعظم عمران خان کی اسمارٹ لاک ڈاؤن حکمت عملی سے کورونا پھیلاؤ کی شرح کم ہوئی ہے۔

تفصیلات کے مطابق وزیرخارجہ شاہ محمود قریشی کا سعودی وزیر خارجہ شہزادہ فیصل بن فرحان سے ٹیلی فونک رابطہ ہوا جس میں دونوں وزرائے خارجہ میں حج کی محدود ادائیگی کے حوالے سے بھی بات چیت کی گئی۔

دونوں رہنماؤں نے کورونا، مقبوضہ کشمیرکی صورتحال،دو طرفہ تعلقات سمیت باہمی دلچسپی کے امور پر تبادلہ خیال کیا۔

اس موقع پر وزیر خارجہ نے سعودی فرمانروا کی صحت کے حوالے سے خیریت دریافت کی جس پر سعودی وزیرخارجہ نے کہا کہ شاہ سلمان کامیاب سرجری کے بعد تیزی سے رو بصحت ہیں۔

شاہ محمود قریشی نے سعودی ہم منصب کو کرونا پھیلاؤ کو روکنے کے لیے اسمارٹ لاک ڈاؤن اور دیگراقدامات سے آگاہ کرتے ہوئے کہا کہ وزیر اعظم عمران خان کی اسمارٹ لاک ڈاؤن حکمت عملی سے کورونا پھیلاؤ کی شرح کم ہوئی ہے۔

ہم مالدیپ کے ساتھ اپنے تعلقات کو مضبوط دیکھنا چاہتے ہیں، وزیر خارجہ

انہوں نے سعودی دفاعی تنصیبات پر حوثی ملیشیا کے حملوں کی شدید مذمت کرتے ہوئے کہا کہ پاکستان ہرمشکل گھڑی میں سعودی عرب کے ساتھ ہے،سعودی عرب کی سالمیت اور تحفظ کے لیے ہرممکن تعاون جاری رکھیں گے۔

ملاقات میں سعودی وزیر خارجہ شہزادہ فیصل بن فرحان آل سعود نے کہا کہ محدود پیمانے پر حج کا فیصلہ وبائی صورتحال کے باعث کیا گیا۔