وزیر خارجہ شاہ محمود قریشی نے کہا ہے کہ بھارت اقوام متحدہ کے مبصرین کو محدود کر کے رکھتا ہے تاکہ وہ سچ نہ دیکھ سکیں۔

لائن آف کنٹرول پر بین الاقوامی میڈیا کے دورہ کے حوالے سے وزیر خارجہ شاہ محمود قریشی نے اپنے بیان میں کہا ہے کہ غیر ملکی میڈیا نمائندوں کا ایل او سی کا دورہ بہت اہم تھا کیونکہ ہندوستان کی طرف سے ہمیشہ دوہرا معیار سامنے آیا لیکن پاکستان نے بلایا اور کہا کہ آکے دیکھئے کہ کیا بھارت انڈیپینڈینٹ صحافیوں کو مقبوضہ کشمیر لے کر جائے گا۔

وزیر خارجہ شاہ محمود قریشی کا کہنا تھا کہ بھارت عالمی قوانین کی خلاف ورزیاں کررہا ہے۔

شاہ محمود قریشی نے کہا کہ بھارت لائن آف کنٹرل پر شہری آبادیوں کو نشانہ بنا رہا ہے جہاں اقوام متحدہ نے اپنے مبصر بھی تعینات کیے ہوئے ہیں لیکن بھارت ان کو محدود کر کے رکھتا ہے تاکہ وہ سچ نہ دیکھ سکیں۔

انہوں نے کہا کہ اقوام متحدہ جنرل اسمبلی کے صدر پیر کو پاکستان آ رہے ہیں میں ان کے سامنے پاکستان کامؤقف رکھوں گا اور انہیں اس ساری صورتحال سے آگاہ کروں گا۔

انہوں نے بتایا کہ بنگلہ دیش کے ساتھ ہم اچھے دو طرفہ تعلقات کے خواہاں ہیں۔

وزیر خارجہ کا کہنا تھا کہ ہم ماضی کی تلخیاں بھلا کر اچھا مستقبل چاہتے ہیں جس کے لئے ہم نے بنگلہ دیش میں نئے سفیرکی تعیناتی بھی کر دی ہے۔

ان کا مزید کہنا تھا کہ پاکستان، چین، نیپال یا بنگلہ دیش ہو، بھارت کے بتدریج اپنے ہمسایوں کے ساتھ تعلقات کشیدہ ہو رہے ہیں، بھارت” ہندوتواء “سوچ کی وجہ سے دیگر علاقائی ممالک کے ساتھ تعلقات خراب کر رہا ہے۔

انہوں نے بتایا کہ ایران نے بھی بھارت کو چاہ بہار منصوبے سے باہر نکال دیا ہے بھارت سرکار کی پالیسیوں کے باعث ایک سال میں “شائننگ انڈیا” کےامیج کا بیڑہ غرق ہو گیا ہے۔