پاکستان مسلم لیگ (ن) کی ترجمان مریم اورنگزیب نے کہا ہے کہ عمران صاحب نے بی آرٹی پشاور منصوبے کا افتتاح کرتے ہوئے کھلم کھلا توہین عدالت کی ہے، اس پر چیف جسٹس نوٹس لیں۔

مریم اورنگزیب نے کہا ہے کہ عمران صاحب بی آرٹی پشاورکے نامکمل منصوبے کا افتتاح کرتے ہوئے کچھ شرم توآرہی ہوگی؟

انہوں نے بتایا کہ سپریم کورٹ کا فیصلہ ہے کہ پارٹی پرچم کا رنگ یا پارٹی برینڈنگ نہ کی جائے لیکن بی آرٹی افتتاحی تقریب میں جھنڈیاں اور تمام برینڈنگ تحریک انصاف کے جھنڈے کے رنگوں کے مطابق تھیں۔

دوسری جانب پاکستان مسلم لیگ (ن) کی ترجمان مریم اورنگزیب نے وزیراعظم عمران خان سے نامکمل بی آرٹی کے افتتاح پر شہباز شریف سے معافی مانگنے کا مطالبہ کیا ہے اور کہا ہے کہ عمران صاحب 126 ارب کے کھڈوں کا افتتاح کرنے سے پہلے شہبازشریف سے معافی مانگتے کیونکہ نوازشریف ، شہبازشریف نے سات سال پہلے میٹروز بنائیں، چلائیں اور عوام کو سہولت دی۔

انہوں نے بتایا کہ شہبازشریف نے چار شہروں میں ریکارڈ مدت اور قومی خزانے کی ریکارڈ بچت سے چار میٹروز بنائیں لیکن پھر بھی پنجاب میں شہبازشریف کی میٹرو حرام اور پشاورمیں مہنگی ترین ایک میٹرو حلال ؟

ان کا کہنا تھا کہ پنجاب کے شہریوں کو اچھے، سستے اور معیاری سفر کی سہولت ملے تو آپ کو برا لگتا ہے؟ کنٹینر پر کھڑے ہو کر جس منصوبے کی مخالفت کرتے رہے، آج اسی پر اپنے نام کی بے شرمی سے تختی لگادی؟ شرم آنی چاہئے کہ نوازشریف اور شہبازشریف کے پبلک ٹرانسپورٹ کے منصوبوں کی مخالفت کرتے رہے ہیں۔