بھارتی افواج کی جانب سے ایل او سی پر جنگ بندی انتظامات کی خلاف ورزیاں کرنے پر پاکستان میں بھارتی ہائی کمیشن کے سینئر سفارتکار کی دفتر خارجہ طلبی کی گئی۔

ترجمان دفتر خارجہ زاہد حفیظ چوہدری  کے مطابق ایل او سی پر جنگ بندی انتظامات کی خلاف ورزیاں کرنے پر بھارتی ہائی کمیشن کے سینئر سفارتکار کو دفتر خارجہ طلب کرکے احتجاج ریکارڈ کرایا گیا۔

ترجمان دفتر خارجہ نے کہا کہ بھارت کی جانب سے 19 اگست کو ایل او سی کے سبز کوٹ سیکٹر میں جنگ بندی کی خلاف ورزی کی گئی۔ ایل او سی کے سبزکوٹ سیکٹر میں بھارتی افواج نے بلا اشتعال فائرنگ و گولہ باری کی۔

زاہد حفیظ چوہدری نے کہا کہ 19 اگست کو سبز کوٹ سیکٹر میں بھارتی افواج کی فائرنگ سے کھوئی گاؤں کی 70 سالہ جان بی بی بیوہ صدیق شدید زخمی ہوئیں۔

انہوں نے بتایا کہ  رواں برس بھارت 2027 مرتبہ جنگ بندی کی خلاف ورزیاں کر چکا ہے۔ ان خلاف ورزیوں میں 16 نہتے شہری شہید اور  166 زخمی ہو چکےہیں۔

ترجمان دفتر خارجہ نے کہا کہ بھارتی فورسز لائن آف کنٹرول، ورکنگ باؤنڈری پر مسلسل نہتی شہری آبادی کو نشانہ بنا رہی ہیں۔ بھارت کا معصوم شہریوں کو جان بوجھ کر نشانہ بنانا قابل مذمت ہے۔

زاہد حفیظ چوہدری کا کہنا تھا کہ   بھارت کی اشتعال انگیزی خطے میں امن و سلامتی کے لیے خطرہ ہے۔ بھارت ان حرکتوں سے مقبوضہ کشمیر کی صورتحال سے دنیا کی توجہ نہیں ہٹا سکتا۔

انہوں نے مزید کہا کہ  بھارت اقوام متحدہ سلامتی کونسل کی قراردادوں پر عمل درآمد یقینی بنائے اور  2003ء کے فائر بندی انتظام کی پاسداری کرے۔ نہتے شہریوں کو نشانہ بنانا عالمی قوانین اور اقدار کے منافی ہے۔