معاون خصوصی برائے سیاسی روابط ڈاکٹر شہباز گل نے کہا ہے کہ سازش کا کھیل اب پرانا ہو چکا ہے۔

تفصیلات کے مطابق معاون خصوصی برائے سیاسی روابط ڈاکٹر شہباز گل کی جانب سے نفیسہ شاہ کے بیان پر ردعمل ظاہر کیا گیا ہے۔

شہباز گل نے کہا ہے کہ آپ میڈیا کی بجائے عدالت میں اپنی منی ٹرایل دیں اور سازش ناکام بنا دیں کیونکہ جس کے پاس اپنے لوٹے مال کا حساب نہیں وہ سازش کا آلاپ شروع کر دیتا ہے۔

ان کا کہنا تھا کہ آپ میڈیا پر نہیں عدالت میں اپنی منی ٹرایل دیں اور کلین چٹ لے لیں۔

انہوں نے کہا ہے کہ بی بی نیب نے کیا پارک لین کی پراپرٹیز گن پوائنٹ پر زرداری صاحب کے نام کر دیں ہیں؟

یاد رہے کہ اس سے قبل پاکستان پیپلزپارٹی کی مرکزی سیکرٹری اطلاعات ڈاکٹر نفیسہ شاہ نے فیصلے پر سوالات اٹھائے تھے۔

نفیسہ شاہ نے کہا ہے کہ پیپلزپارٹی نے ہمیشہ عدالتوں کا احترام کیا ہے لیکن پیپلزپارٹی کی قیادت کے خلاف کیسز میں انصاف ہوتا ہوا نظر نہیں آ رہا ہے۔

پیپلزپارٹی کی مرکزی سیکرٹری اطلاعات نے کہا ہے کہ نیب کے کیسز اور ریفرنس بے بنیاد اور انتقامی کارروایوں پر مبنی ہیں کیونکہ سپریم کورٹ کے فیصلے کے بعد  نیب کی کوئی ساکھ نہیں رہی ہے۔

انہوں نے کہا کہ وکلاء کی عدم موجودگی میں سابق صدر آصف زرداری پر فرد جرم عائد کرنے سے کئے سوالات جنم لیتے ہیں جبکہ پیپلزپارٹی تحقیقاتی افسران کی اہلیت، قابلیت اور متصبانہ رویئے پر سوالات اٹھاتی رہی ہے۔