ترجمان دفتر خارجہ زاہد حفیظ چوہدری کا کہنا ہے کہ بھارتی حکومت ہندوتوا پالیسی پر گامزن ہے۔

ترجمان دفتر خارجہ زاہد حفیظ چوہدری  کا ہفتہ وار بریفنگ میں کہنا تھا کہ   پانچ اگست کو کشمیر میں بھارتی غیر قانونی تسلط کو ایک سال مکمل ہوا۔بھارت نے ایک سال سے کشمیریوں کو تمام بنیادی انسانی سہولیات سے محروم رکھا ہے۔

زاہد حفیظ چوہدری   نے راجوری میں تین کشمیر کی شہادت کی مذمت کرتے  ہوئے کہا کہ  بھارتی حکومت اقلیتوں کے تحفظ کو یقین بنائے۔

انہوں نے کہا کہ   بھارتی حکومت ہندوتوا پالیسی پر گامزن ہے۔

ترجمان دفتر خارجہ نے کہا کہ آج وزیر خارجہ چین کے دورے پر گئے ہیں۔ دورے کے دوران کورونا ،باہمی تعلقات اور علاقائی اور عالمی امور پر بات ہو گی۔

زاہد حفیظ چوہدری    کا کہنا تھا کہ وزیر خارجہ کا دورہ چین پاک چین تعلقات کو  مزید مضبوط کرے گا۔

انہوں نے مزید کہا کہ  وزیر خارجہ سے امریکی سیکرٹری آف اسٹیٹ مائیک پومپیو کا رابطہ ہوا۔ وزیر خارجہ نے مقبوضہ کشمیر میں بھارتی مظالم اور موجودہ صورتحال پر تبادلہ خیال کیا۔

ترجمان دفتر خارجہ نے کہا کہ  پاکستان سمجھتا ہے کہ افغانستان میں امن کے لیے تمام تر ممکنہ مواقع سے فائدہ اٹھانا چاہیے۔

زاہد حفیظ چوہدری نے مزید کہا کہ  پاکستان نے مشرق وسطی ٰاور فلسطین کے معالے پر اپنی پوزیشن واضح کی ہوئی ہے۔ فلسطین کے مسئلے پر ہمارے موقف میں کوئی تبدیلی نہیں آئی۔ ہم فلسطین کے دو ریاستی حل کے حامی ہیں۔

انہوں نے کہا کہ  ہمارے موقف میں واضح ہے کہ اسرائیل 1967 سے پہلے کی سرحدوں پر واپس جائے۔ ہم بیت المقدس کے بطور دارلحکومت فلسطینی ریاست کے حامی ہیں۔

ترجمان دفتر خارجہ کا کہنا تھا کہ پاکستان اور سعودی عرب کے دیرینہ تعلقات ہیں جن میں وقت کے ساتھ اضافہ ہوا ہے۔   وزیر اعظم اور سعودی ولی عہد کے 2019 کے تاریخی دوروں نے پاک سعودی تعلقات میں سنگ میل پیش رفت کی ہے۔

زاہد حفیظ چوہدری نے کہا کہ  اقتصادیات،دفاع سمیت متعدد شعبوں میں تعلقات آگے بڑھے ہیں۔