وفاقی وزیر اطلاعات شبلی فراز نے کہا ہے کہ پاکستان کے لئے سخت وقت گزر گیا ہے اور اب بہتر وقر پاکستان کا منتظر ہے۔

تفصیلات کے مطابق آج وزیراعظم کی زیر صدارت کابینہ کا اجلاس ہوا جس کے بعد وفاقی وزیر اطلاعات شبلی فراز کی جانب سے پریس کانفرنس کی گئی ہے۔

پریس کانفرنس کے دوران وفاقی وزیر نے بتایا کہ حفیظ شیخ نے کابینہ اجلاس  میں معاشی صورتحال پر بریف کیا جس میں بتایا کہ کرنٹ اکاؤنٹ خسارہ تین بلین ڈالر پر آگیا ہے۔

انہوں نے بتایا کہ احساس پروگرام کے ذریعے ڈیڑھ کروڑ لوگوں کو پیسے شفاف طریقے سے دیئے گئے جبکہ یوٹیلیٹی اسٹورز کے ذریعے بھی لوگوں کو سبسڈی دی گئی، کنسٹرکشن انڈسٹری کو بھی ٹیکس میں چھوٹ اور ریلیف دیا گیا ہے۔

مزید پڑھیں

وزیر اعظم کا معاشی صورت حال میں حالیہ استحکام پر اطمینان کا اظہار

وزیراعظم عمران خان نے معاشی صورت حال میں حالیہ استحکام پر اطمینان...

ان کا کہنا تھا کہ بڑے بڑے ممالک کی شرح اموات اور نقصان پاکستان سے ذیادہ رہا لیکن اللہ نے حکومت کی کوشش میں برکت ڈالی اور اب معیشت میں بہتری آنا شروع ہوگئی ہے۔

شبلی فراز کا کہنا تھا کہ موجودہ حکومت میں سیمنٹ کی ایکسپورٹس بڑھ گئی ہیں، فرٹیلائزرز 22 فیصد زیادہ خریدی گئی ہیں اور 300 ارب کے اضافی ریونیو اکٹھا کیا سٹاک ایکسچینج میں بھی تیزی آئی ہے۔

 انہوں نے کہا ہے کہ کابینہ اجلاس میں میڈیا ہاؤسز کو کی گئی ادائیگی سے بھی وزیراعظم کو آگاہ کیا گیا ہے کیونکہ میڈیا ہاؤسز کو 80 فیصد ادائیگی کرچکے ہیں۔

یاد رہے کہ اس سے قبل اجلاس میں  وزیراعظم اور وفاقی کابینہ کو ملکی معاشی معاملات پر تفصیلی بریفنگ دی گئی۔

وزیراعظم نے معاشی صورت حال میں حالیہ استحکام پر اطمینان کا اظہار کرتے ہوئے کہا کہ  موڈیز کی جانب سے ملکی معیشت کی آؤٹ لک کو مستحکم قرار دیا جانا خوش آئند ہے۔

وزیراعظم نے معاشی اعشاریوں میں بہتری کے لیے اقدامات جاری رکھنے کی ہدایت کی۔

وزیراعظم کو قبضہ مافیا کے خلاف جاری آپریشن پر بھی بریفنگ دی گئی جبکہ لینڈ گریبنگ کے واقعات کی روک تھام کے لیے پولیس اقدامات کی رپورٹ بھی کابینہ میں پیش کی گئی۔

وزیراعظم نے آئی جی اسلام آباد کو قبضہ مافیا کے خلاف آپریشن پر شاباش دیتے ہوئے بھرپور آپریشن جاری رکھنے کی ہدایت کی۔