جماعت اسلامی کی کشمیر ریلی میں کریکر حملہ ہوا ، حملے میں متعدد افراد زخمی ہوگئے ہیں۔

تفصیلات کے مطابق کراچی کے علاقے گلشن اقبال میں بیت المکرم مسجد کے قریب جماعت اسلامی کی کشمیر ریلی میں کریکر حملہ ہوا۔

ذرائع کا کہنا ہے کہ حملے میں 8  افراد کے زخمی  ہونے کی اطلاع موصول ہوئی جنہیں طبی امداد کے لئے لیاقت نیشنل اور آغا خان اسپتال منتقل کیا جارہا ہے۔

ذرائع کا مزید کہنا ہے کہ حملے کے بعد رینجرز نے ریلی کو آگے بڑھنے سے روک دیا۔

عینی شاہد کے مطابق بیت المکرم پیڈسٹل برج کے قریب فت پاتھ پر دھماکہ حافظ نعیم الرحمان کی تقریر کے دوران ہوا۔

پولیس حکام کا کہنا ہے کہ جماعت اسلامی کی یوم استحصال کشمیر ریلی میں دستی بم پھینکا گیا، ریلی بیت المکرم مسجد سے حسن اسکوائر کی جانب جارہی تھی۔

پولیس حکام کا مزید کہنا ہے کہ موٹر سائیکل سوار ملزمان دستی بم پھینک کرفرار ہوئے جس کے باعث  8 آٹھ افراد زخمی ہوئے ہیں جبکہ دھماکے سے قریبی گاڑیوں کے شیشے  بھی ٹوٹ گئے۔

کراچی میں ریلی پر حملے کے حوالے سے ایس ایس پی ایسٹ ساجد امیر نے گفتگو کرتے ہوئے کہا کہ جماعت اسلامی کی ریلی کو سیکیورٹی فراہم کی گئی تھی لیکن حملے کی اطلاع ملتے ہی پولیس ورینجرز کی بھاری نفری یونیورسٹی روڈ پہنچ گئی ہے۔

ایس ایس پی ایسٹ ساجد امیر نے دعوی کیا کہ کریکر حملہ موٹر سائیکل سواروں کی جانب سے کیا گیا اور واقعے میں متعدد افراد زخمی ہوئے ہیں۔