پاکستان میں امریکی قائمقام سفیر ایمبیسڈر پاول جونز نے کہا ہے کہ مشکل دور میں خوشحالی کی بحالی کے لیے ہم قرضوں کی واپسی معطل کر رہے ہیں۔

تفصیلات کے مطابق پاکستان میں تعینات امریکی قائمقام سفیر پال جونز نے یوم آزادی پر پاکستانی قوم کو مبارکباد پیش کی ہے۔

ایمبیسڈر پاول جونز کا کہنا تھا کہ امریکہ کے عوام اور پاکستان میں امریکی سفارتی مشن کی جانب سے پاکستانیوں کو یوم آذادی کی مبارکباد دیتا ہوں بطور امریکی ہم لوگ آزادی کے دن کی اہمیت سے بخوبی آگاہ ہیں، ہم دونوں ممالک آزادی اور حق خود ارادیت کی خواہش کے نتیجہ میں معرض وجود میں آئے پاکستان کے پاس ایک خود مختار اور آزاد ملک کے طور پر جشن منانے اور فخر کرنے کے لیے بہت کچھ ہے۔

پاول جونز کا کہنا تھا کہ کورونا وائرس کے سدباب کے لیے پاک امریکہ شراکت حفظان صحت کے عملہ کی تربیت، موبائل لیبز اور وینٹی لیٹرز کی فراہمی کو یقینی بنا رہی ہے۔

حالیہ مشکل دور میں خوشحالی کی بحالی کے لیے ہم قرضوں کی واپسی معطل کر رہے ہیں۔

امریکہ آئی ایم ایف سے ہنگامی امداد کے اجراء کی حمایت اور تجارت و سرمایہ کاری میں توسیع کے لیے بھی تعاون کر رہے ہیں۔

انہوں نے کہا کہ پاکستان اور امریکہ ساتھ مل کر افغانستان میں قیام امن، جنگ کے خاتمے اور خطے کی خوشحالی کے لیے مذاکرات پر زور دے رہے ہیں۔

امریکہ کو پاکستان کے ساتھ اشتراک پر فخر ہے کیونکہ خوشحال پاکستان کا وجود بہتر اور محفوظ دنیا کے مفاد میں ہے سارے پاکستانیوں کے لیے شاندار صحت، کامیابی، امن اور تندرستی کا متمنی ہوں۔