وزیراعلیٰ پنجاب سردار عثمان بزدار نے کہا ہے کہ پنجاب کابینہ نے پراپرٹی ٹیکس میں اضافے کو مسترد کر کے عوام کو حقیقی ریلیف دیا ہے۔

تفصیلات کے مطابق وزیراعلیٰ پنجاب سردار عثمان بزدار کی زیر صدارت پنجاب کابینہ کا 34واں اجلاس ہوا جس میں پنجاب کابینہ نے پراپرٹی ٹیکس کی نئی درجہ بندی کرنے سے متعلق ویلیوایشن ٹیبل مرتب کرنے کی تجویز مسترد کردی۔

اجلاس میں کم مقدمات رکھنے والی انسداد دہشت گردی عدالتوں کے امورکوحقیقت پسندانہ بنانے اور چیرٹیز کی آن لائن رجسٹریشن کی تاریخ میں توسیع کا فیصلہ کیا گیا۔

پنجاب کابینہ نے چیرٹیز کی آن لائن رجسٹریشن کی تاریخ میں 15اکتوبر تک کی توسیع کرنے کی منظوری دے دی جبکہ ای اشٹام کے ریفنڈ سے متعلق پنجاب ای اشٹام رولز 2016میں ترامیم  اور عوام کی سہولت کیلئے 5لاکھ تک اشٹام پیپر کے ریفنڈ کا اختیار کمشنر کو دینے کی بھی منظوری دے دی۔

اجلاس میں جنوبی پنجاب سیکرٹریٹ کے قیام کے لئے رولز آف بزنس 2011میں ترامیم اور پنجاب شوگر فیکٹریز (کنٹرول) ایکٹ 1950میں ترامیم کی منظوری دی۔

پنجاب کابینہ نے پرائم منسٹر نیا پاکستان ہاؤسنگ پروگرام کے تحت پنجاب ہاؤسنگ اینڈ ٹاؤن پلاننگ ایجنسی کوپنجاب بھرمیں ہاؤسنگ سکیمیں شروع کرنے کی منظوری دی گئی جبکہ موٹر وہیکلز آرڈیننس 1965کے سیکشن 120کے تحت موٹر وہیکلز آفیسرز کو اختیارات تفویض کرنے کی بھی منظوری دی۔

اجلاس میں پنجاب کابینہ نے سپریم کورٹ کے معزز جج کی ہدایات کی روشنی میں 6انسداد دہشت گردی کی عدالتوں کی بندش کی منظوری جبکہ پنجاب ہیرٹیج فاؤنڈیشن کی ایگزیکٹو کمیٹی کی تشکیل اور پنجاب گورنمنٹ ایڈور ٹائزمنٹ پالیسی 2020میں ترامیم کی بھی منظوری دی۔

وزیراعلیٰ پنجاب نے اجلاس کی صدارت کرتے ہوئے کہا کہ جنوبی پنجاب سیکرٹریٹ میں 16محکموں کے سیکرٹریز فرائض سرانجام دیں گے اور ہمارا یہ اقدام جنوبی پنجاب صوبے کی اہم قدم ہے۔

عثمان بزدار نے یہ بھی کہا کہ ہم نے عوام سے کیا ایک اوروعدہ پورا کیا ہے، ماضی میں صرف نعروں سے جنوبی پنجاب کے عوام کو بہلایا گیا۔

وزیراعلیٰ پنجاب سردار عثمان بزدار نے مزید کہا کہ ہم عوام کو ریلیف دینے کیلئے آئے ہیں، آج وزیراعظم عمران خان کی قیادت میں جنوبی پنجاب کے عوام کو ان کا حق دیا جارہا ہے، عوامی خدمت کے سفر میں کوئی رکاوٹ برداشت نہیں کریں گے۔

صوبائی وزراء، مشیران، معاونین خصوصی، چیف سیکرٹری اور متعلقہ محکموں کے سیکرٹریز نے اجلاس میں شرکت کی۔