اقوام متحدہ کی جنرل اسمبلی کے نو منتخب صدر وولکن بوزکر کا کہنا ہے کہ دنیا کو کورونا سے نمٹنے کے لیے پاکستان کی کوششوں سے سیکھنے کی ضرورت ہے۔

تفصیلات کے مطابق  وزیرخارجہ شاہ محمود قریشی نے اقوام متحدہ کی جنرل اسمبلی کے نو منتخب صدر وولکن بوزکر سے ملاقات کے بعد ان کے ہمراہ پریس کانفرنس کی۔

اس موقع پر وزیر خارجہ نے کہا کہ  میں وولکن بوزکر کو پاکستان اور دفتر خارجہ آمد پر خوش آمدید کہتا ہوں اور انہیں  مبارکباد دیتا ہوں کہ وہ پہلے ترک ہیں جو اقوام متحدہ کی جنرل اسمبلی کے صدر منتخب ہوئے۔

شاہ محمود قریشی نے بتایا کہ  ملاقات میں کورونا ، کشمیر ، موجودہ مسائل اور اقوام متحدہ کو درپیش دیگر مسا ئل پر گفتگو ہوئی۔

انہوں نے بتایا کہ کورونا کے حوالے سے تفصیلی گفتگو ہوئی ہے۔کشمیر کی صورت حال پر مفصل بریفنگ دی اور  کشمیر میں انسانی حقوق کی پامالیوں کے حوالے سے تفصیلی تبادلہ خیال ہوا۔

وولکن بوزکر کو کشمیر کے حوالے سے کی جانے والے کاوشوں کے حوالے سے بھی بریفنگ دی گئی جبکہ افغانستان کے حوالے سے گفتگو بھی ملاقات کا حصہ رہی۔انٹرا افغان مذاکرات پر تفصیلی تبادلہ خیال اور قیدیوں کی رہائی کے بارے میں بھی گفتگو ہوئی۔

وولکن بوزکر کا کہنا تھا کہ   پاکستان برادر اسلامی ملک ہے اور یہاں کا دورہ باعث مسرت ہے۔پاکستان اور ترکی کے مابین تعلقات صدیوں پر محیط ہیں۔پرتپاک خیرمقدم پر پاکستان کا شکر گزار ہوں۔

انہوں نے مزید کہا کہ  اقوام متحدہ کے تناظر میں بھی یہ دورہ انتہائی اہم ہے۔پاکستان غیروابستہ تحریک، او آئی سی اور دیگر گروپس کا حصہ ہے۔پاکستان اقوام متحدہ کے امن مشنز کا بھی کلیدی حصہ ہے۔

اقوام متحدہ جنرل اسمبلی کے صدر نے کہا کہ پاکستان کے سفیر فاروق خان کو اپنی کابینہ کے نائب چیف کے طور پر چنا ہے۔ پاکستان کے مستقل مندوب منیراکرم کی بھرپور معاونت بھی حاصل ہے۔

وولکن بوزکر نے کہا کہ  میں نے کچھ عرصہ قبل پاکستان کے دورے پر آنا تھا لیکن کچھ معاملات کی وجہ سے تاخیر ہوئی۔پاکستان کا دورہ کرکے خوشی محسوس کر رہا ہوں۔پاکستان اقوام متحدہ کا اہم ملک ہے۔