پاکستان کے سابق کپتان اور ٹیسٹ کرکٹر جاوید میانداد کا کہنا ہے کہ عمران خان کو وزیراعظم میں نے بنوایا،  عمران خان کو چلانے والا ہی میں تھا۔

اپنے جاری کردہ بیان میں جاوید میانداد کا کہنا تھا کہ  کرکٹرز کو روزگار نہیں دیا الٹا بیروزگار کردیا، عمران میرے نہیں میں عمران خان کا کپتان تھا،  عمران خان خدا بن کر بیٹھے ہیں، سیاست میں آکر انکو بتائونگا کیسے نظام کو چلاتے ہیں،  کرکٹرز آج روڈ پر آگئے کوئی گاڑی اور کوئی بائیکیا چلا رہا ہے۔

سابق کپتان لیجنڈری جاوید میانداد وزیراعظم عمران خان پر تنقید کرتے ہوئے کہا کہ  عمران سمجھ رہے ہیں کہ انکے علاوہ کوئی آکسفورڈ نہیں گیا،  کرکٹ بورڈ میں سب نااہل بھرتی کردئیے جنہیں پتہ ہی نہیں کرکٹ کیسے چلاتے ہیں۔

ٹیم منیجمنٹ اور کپتان پر تنقید کرتے ہوئے پاکستان کرکٹ ٹیم کے سابق کپتان جاوید میانداد کا کہنا تھا کہ کاپی ینسل پکڑ کر کوچنگ کرنے والوں کو کالج جانے کا مشورہ دے دیا، پی سی بی کے میڈیا ڈائریکٹر سمیع الحسن برنی کے ذریعہ مانچسٹر ٹیسٹ جیتنے کے لئے ایک اچھا مشورہ دیا جو ہوا میں اڑادیا گیا، سابق کپتان سرفراز احمد کو  گیارہواں کھلاڑی بناکر گرائونڈ میں بھیجنے کے فیصلہ کو بھی تنقید کا نشانہ بنایا، انگلینڈ کے خلاف پہلے ٹیسٹ کے آخری دن سے قبل مجھے سمیع برنی نے فون کیا تو میں نے انہیں مشورہ دیا کہ کپتان کو بتادیں کہ انگلینڈ کو اسپنرز سے اٹیک کریں، نئی گیند ہے تو کیا ہوا، ہم ماضی میں ایسا کرتے رہے ہیں۔

انہوں نے مزید کہا کہ چوتھی اننگ میں 220 اسکور بھی بہت ہوتا ہے، اسپنر 60 رنز دیکر 6 آئوٹ کردے گا، فاسٹ بالر نے 6 وکٹیں نہیں لینی، علم نہیں کہ میرا مشورہ پہنچا یا ہوا میں اڑایا گیا، 2 باتوں سے مجھے تکلیف ہوئی، چیمپئنز ٹرافی کے کپتان سرفراز احمد کو 12 واں کھلاڑی بناکر اسے خراب کرنے کے لئے بھیجا گیا۔