متحدہ قومی موومنٹ (ایم کیو ایم ) کے رہنماء فاروق ستار نے کہا ہے کہ کراچی کو ضلع بنانے کی سازش لسانیت کو ہوا دینا ہے۔

تفصیلات کے مطابق فاروق ستار کی کامران ٹیسوری کے ہمراہ پریس کانفرنس میں کہنا تھا کہ آج وزیراعلی سندھ نے کراچی کی مزید تقسیم کا فیصلہ کیا ہے۔

انہوں نے کہا ہے کہ شہر قائد کو مکمل کالونی بنانے کا فیصلہ کرلیا گیا ہے جبکہ یہ سندھ حکومت کا مینڈٹ نہیں ہے اور پوری عوام کی جانب سے ہم کراچی کو ضلع بنانے کے فیصلے کو مسترد اور مزمت کرتے ہیں۔

فاروق ستار نے کہا ہے کہ میں کراچی کے معاملے پر چیف آف آرمی اسٹاف، چیف جسٹس، وزیر اعظم اور صدر سے ایس او ایس کال دینا چاہتا ہوں کیونکہ پیپلز پارٹی شہریوں کی خواہش نہ ہونے کے باوجود آمرانہ فیصلہ کررہی ہے جبکہ نالوں، کچرے، بجلی کی لوڈشیڈنگ اور اوور بلنگ کے مسئلے الگ ہیں۔

مزید پڑھیں

سندھ کابینہ نے کیماڑی کو ضلع بنانے کی منظوری دے دی

سندھ کابینہ نے کراچی کے علاقے کیماڑی کو ساتواں ضلع بنانے کی...

یاد رہے کہ آج سندھ کابینہ کے اجلاس میں کراچی کے علاقے کیماڑی کو ساتواں ضلع بنانے کی منظوری دے دی گئی۔

 اس سے قبل کراچی کے چھ اضلاع شرقی، غربی، جنوبی، وسطی، ملیر اور ضلع کورنگی تھے۔

صوبائی کابینہ کے اجلاس میں وزیراعلیٰ سندھ مراد علی شاہ کہا کہ جو اضلاع بڑے ہیں ان کو مزید تقسیم کرنے کی تجاویز بھی دی جائیں۔

بریفنگ کے دوران بتایا گیا کہ ضلع غربی میں7 سب ڈویژن ہیں ، آبادی کے لحاظ سے ضلع غربی  پورے سندھ میں بڑا ضلع ہے ، جس کی آبادی 39لاکھ14ہزار757 ہے۔

کابینہ اجلاس میں وزرا کی جانب سے خیرپور ضلع کو بھی 2حصوں میں تقسیم کرنے کی تجویز دی گئی۔

کابینہ اجلاس کے دوران ضلع غربی کو بھی دو حصوں میں تقسیم کرنے کے حوالے تبادلہ خیال ہوا ہے اور وزیراعلیٰ سندھ نے اس پر مزید تجاویز مانگی ہیں۔

ذرائع کے مطابق ضلع جنوبی کا نام تبدیل کیا جائے گا اوراس حوالے سے مراد علی شاہ نے تجویز دی کہ اس کو ضلع کراچی کا نام دیا جائے۔

کراچی کے علاقہ لیاری کو بھی ایک نیا ضلع بنانے پر غور کیا جا رہا ہے۔

دو کروڑ سے زائد آبادی والے شہر کراچی میں اس وقت چھ اضلاع ہیں اور ساتواں ضلع کیماڑی ہوگا۔