مقبوضہ وادی کے مکین آج بھارت کا یوم آزادی یوم سیاہ کے طور پر منائیں گے، پوری وادی میں ہڑتال ہوگی۔

اس ضمن میں حریت کانفرنس نے آج بھارتی کے یوم آزادی پر پوری دنیا میں یوم سیاہ منانے کا اعلان کردیا ہے جس کی وجہ سے پوری مقبوضہ وادی میں مکمل ہڑتال کی جائے گی اور گلی گلی قریہ قریہ لوگ سیاہ پرچم لہرائیں گے۔

حریت رہنماؤں کا کہنا ہےکہ بھارت کے کسی ظلم اور ریاستی جبر کو خاطر میں نہیں لایا جائے گا۔

حریت بزرگ رہنما سید علی گیلانی نے عوام سے اپیل کی ہے کہ وہ آج یوم سیاہ منائیں اور دنیا کو بتا دیں کہ وہ بھارتی تسلط کے خلاف اور آزادی کے لیے خون کے آخری قطرے تک لڑتے رہیں گے۔

 میر واعظ عمر فاروق  اور دیگر حیریت کانفرنس رہنماؤں نے بھی عوام سے آج یوم سیاہ منانے کا اعلان کردیا ہے۔

ان کا کہنا تھا کہ بھارتی ریاستی دہشت گردی اور جبرکشمیریوں کے جذبہ آزادی کو نہیں دبا سکتا کیونکہ اب دنیا اس با ت کو محسوس کرنے لگی ہے کہ کشمیر پر بھارت کا قبضہ غیر قانونی ہے۔

دوسری جانب پاکسان کے یوم آزادی پر مقبوضہ وادی میں جشن آزادی جوش و خروش سے منایا گیا۔

بھارت فوج کی پابندیاں اور سیکورٹی کے سخت انتظامات کے باوجود کشمیریوں کوپاکستان زندہ باد کے نعروں سے نہ روک سکے، ان کی آنکھوں میں پاکسان سے محبت اور آزادی کا جذبہ چمک رہا تھا، کشمیریوں نے ایک بار پھر اس عزم کا اطہار کیا کہ لے کے رہیں گے آزادی۔

بزرگ حریت رہنما سید علی گیلانی نے اپنے پیغام میں پاکستانیوں کو دلی کی گہرائیوں سے مبارکبا دی ہے۔

انہوں نے اپنے ٹوئٹ میں کہا کہ امید کرتے ہیں اسلام کا قلعہ پاکستان درپیش چیلنجز سے نبردآزما ہو کر مزید مضبوط ہو کر سامنے آئے گا جبکہ حریت رہنماؤں نے اپنے پیغام میں کہا کہ ان کے دل پاکستانیوں کے ساتھ دھڑکتے ہیں۔