وزیر ریلوے شیخ رشید احمد کا کہنا ہے کہ کوئٹہ ، تفتان ریل ٹریک پر اہم پیشرفت ہوئی ہے۔

 تفصیلات کے مطابق  وزیر ریلوے شیخ رشید احمد سے پاکستان میں ایران کے سفیر سید محمد علی حسینی  نے ملاقات کی۔

ملاقات میں  پاکستان اور ایران کے درمیان ریل کے شعبہ میں تعاون بڑھانے پر بات چیت کی گئی۔

اس موقع پر وزیر ریلوے شیخ رشید نے کہا کہ  پاکستان ریلوے کوئٹہ ، تفتان ریل ٹریک کو اپ گریڈ کرنے کے حوالے سے فیزیبیلیٹی اسٹڈی مکمل کر چکا ہے۔

شیخ رشید نے کہا کہ  کوئٹہ ، تفتان ٹریک کی اپ گریڈیشن پر 112 ارب روپے خرچ ہوں گے۔ پراجیکٹ کی تکمیل سے پاکستان اور ایران کے درمیان مسافروں کی آمدورفت اور تجارت میں اضافہ ہو گا۔

انہوں نے کہا کہ  پاکستان اور چین کے درمیان سی پیک کے تحت منظور ہونے والے ایم ایل ون منصوبے سے پاکستان میں ریل کا انقلاب آئے گا۔

وزیر ریلوے نے کہا کہ خواہش ہے سی پیک منصوبے کے تحت پاکستان اور ایران کے درمیان ریل تعاون کو زیادہ تیزی سے آگے بڑھایا جائے۔

ایرانی سفیر کا کہنا تھا کہ  اکنامک کوورڈینیشن آرگنائیزیشن (ای سی او) کے تحت پاکستان،ایران،ترکی فریٹ ٹرین کے حوالے سے کوششوں کو تیز کرنے کی ضرورت ہے۔

ایرانی سفیر نے شیخ رشید احمد کو ایران کے وزیر ٹرانسپورٹ محمداسلامی کا تہنیتی پیغام بھی پہنچایااور یوم آزادی پاکستان پر وزیر ریلوے کو پیشگی مبارکباد دی۔

پاکستان ریلوےاورایران ریل کے درمیان شراکت داری کے باہمی منصوبوں میں تیزی لانے کے لیے چیئرمین ریلوے کی سربراہی میں کمیٹی قائم کردی گئی۔