بیوی کی اجازت کے بغیر دوسری شادی سے متعلق سپریم کورٹ نے بڑا فیصلہ کرلیا جس کے تحت بغیر اجازت دوسری شادی پر پہلی بیوی کو حق مہر فوری طور پر ادا کرنا ہوگا۔

تفصیلات کے مطابق سپریم کورٹ آف پاکستان نے ایک کیس میں قرار دیا ہے کہ پہلی بیوی کی اجازت کے بغیر دوسری شادی کرنے والے کو پہلی بیوی کا حق مہر فوری طور پر ادا کرنا ہوگا جبکہ مہر معجل ہو یا غیر معجل دونوں صورتوں میں فوری واجب الادا ہوگا۔

پانچ صفحات پر مشتمل فیصلہ جسٹس مظاہر علی اکبر نے جاری کیا، جس میں کہا گیا ہے کہ دوسری شادی کے لئے پہلی بیوی یا ثالثی کونسل کی اجازت لازمی ہے۔

عدالت کا کہنا تھا کہ قانون میں دوسری شادی کیلئے اجازت کا قانون معاشرے کو بہتر انداز سے چلانے کیلئے ہے جبکہ قانون میں دوسری شادی کیلئے اجازت کے قانون کی خلاف ورزی سے کئی مسائل جنم لینگے۔

مزید پڑھیں

دوسری شادی: پہلی بیوی اور مصالحتی کونسل کی اجازت لازم

اسلام آباد ہائی کورٹ کا حکم ہے کہ دوسری شادی کے لیے...

یاد رہے اس سے قبل پشاور کے رہائشی محمد جمیل نے اہلیہ کی اجازت کے بغیر دوسری شادی کی تھی،  پشاور ہائی کورٹ نے محمد جمیل کو بغیر اجازت دوسری شادی کرنے پر پہلی بیوی کو فوری طور پر حق مہر ادا کرنے کا حکم سنایا گیا تھا جس پر پشاور کے رہائشی محمد جمیل نے پشاور ہائیکورٹ کے فیصلے کیخلاف اپیل دائر کی تھی۔

سپریم کورٹ نے حق مہر کی فوری ادائیگی کے فیصلے کیخلاف اپیل خارج کرتے ہوئے بغیر اجازت دوسری شادی پر پہلی بیوی کو حق مہر فوری ادا کرنے کا حکم سنادیا۔