سینیٹر سراج الحق، امیر جماعت اسلامی نے کہا ہے کہ ملک میں حقیقی تبدیلی کے لیے طلبہ اور نوجوانوں کو اپنا موثر کردار ادا کرنا ہوگا۔

تفصیلات کے مطابق اپنے ایک بیان میں سینیٹر سراج الحق نے ملک میں طلبا اور نوجوانوں کے حوالے سے بات کی ہے۔

سراج الحق کا کہنا تھا کہ تبدیلی سرکار 26 ماہ میں اعلانات اور وعدوں پروعدے کر رہی ہے مگر عملی اقدامات کے لیے تیار نہیں ہے۔

انہوں نے کہا ہے کہ خود کو جمہوری کہلانے والی حکومتوں نے بھی اپنے کئے جانے والے وعدوں کے باوجود طلبہ یونینز بحال نہیں کیں ہیں۔

انہوں نے کہا ہے کہ مستقبل میں ملک کی باگ ڈور سنبھالنے والے نوجوانوں کی سیاسی تربیت کے لیے طلبہ یونینز کی بحالی از حد ضروری ہے جس پر ان کیجانب سے حکومت سے مطالبہ کیا ہے کہ حکومت طلبہ یونینز بحال کرے۔

سینیٹر کا کہنا تھا کہ ایک کروڑ نوجوانوں کو روزگار دینے کا وعدہ کرنے والوں نے ایک سو لوگوں کو بھی روزگار نہیں دیا ہے اور اس کے علاوہ حکومت نے تعلیم کو اتنا مہنگا کردیا ہے کہ غریب طالبعلموں کے لیے اپنی تعلیم جاری رکھنا مشکل ہوگیا ہے

سراج الحق نے مزید کہا ہے کہ اسلامی جمعیت طلبہ ہی طلبہ کی نظریاتی تنظیم ہے کیونکہ جمعیت ملک کی نظریاتی اور جغرافیائی سرحدوں کی حفاظت کے ساتھ ساتھ تعلیم کے میدان میں طلبہ کی رہنمائی کررہی ہے۔