پاکستان مسلم لیگ (ن) کے صدر اور قائد حزب اختلاف شہبازشریف نے کہا ہے کہ دفاع وطن کے لئے فضائیہ کو اور بھی مضبوط بنائیں گے۔

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہبازشریف نے یوم فضائیہ پر پاک شاہینوں کو خراج تحسین پیش کرتے ہوئے کہا کہ جنگ ستمبر میں پاک فضائیہ نے قوم کا سر فخر سے بلند کردیا۔

پاکستان مسلم لیگ (ن) کے صدر نے کہا کہ مکار دشمن پر ہماری فضائیہ قہر خداوندی بن کر نازل ہوئی جبکہ ایم ایم عالم نے بھارتی فضائیہ کے پانچ لڑاکا طیارے گرا کر دنیا میں نیا ریکارڈ قائم کردیا

شہبازشریف نے یہ بھی کہا کہ فضائیہ کی عالمی تاریخ میں ایم ایم عالم نے جوبہادری دکھائی، وہ آج بھی منفرد مثال بن کر قائم ہے جبکہ ستائیس فروری کو بالاکوٹ پر حملے کے جواب میں ہمارے شاہینوں نے عقابی روح کا مظاہرہ کیا

پاکستان مسلم لیگ (ن) کے صدر کا کہنا تھا کہ وزیراعظم نوازشریف نے فضائیہ کو طاقتور بنایا، جے ایف 17طیارہ اس امر کا واضح ثبوت ہے۔

قائد حزب اختلاف شہبازشریف نے کہا کہ وقت کے ساتھ ہماری فضائیہ کی صلاحیت، استعداد اور قابلیت میں بے پناہ اضافہ ہوا ہے، دفاع وطن کے لئے فضائیہ کو اور بھی مضبوط بنائیں گے۔ انشاءاللہ

پاکستان مسلم لیگ (ن) کے صدر اور قائد حزب اختلاف شہبازشریف نے مزید کہا کہ شہداءکو خراج عقیدت اور غازیوں کو خراج تحسین پیش کرتے ہوئے کہا کہ اللہ تعالی شہداءکے درجات بلند فرمائے اور لواحقین کو صبر جمیل دے۔ آمین