وزیراعظم کے معاون خصوصی عثمان ڈار نے کہا ہے کہ حکومت عوام تک وسائل کی رسائی کا مسئلہ حل کرے گی۔

تفصیلات کے مطابق وزیراعظم کے معاون خصوصی عثمان ڈار کی جانب سے نوجوانوں میں کامیاب جوان پروگرام کے چیکس تقسیم کرنے کی تقریب سے خطاب کیا گیا۔

خطاب کے دوران وزیراعظم کے معاون خصوصی عثمان ڈار نے کہا ہے کہ کامیاب پروگرام کا بنیادی مقصد ملازمتوں کے مواقع اور روزگار پیدا کرنا ہے اور اس پروگرام کے آغاز سے دس لاکھ لوگوں کو روزگار کے مواقع ملیں گے۔

عثمان ڈار نے کہا ہے کہ کامیاب جوان پروگرام کے تحت ایسے لوگوں کو مدنظر رکھا جا رہا ہے جو ہنر مند ہیں لیکن وسائل یا بینکس تک انکی رسائی ممکن نہیں تھی۔

معاوں خصوصی کا کہنا تھا کہ انڈسٹری کو اٹھانا حکومت کی ترجیح ہے لیکن یہ ہماری بدقسمتی ہے کہ ہمارے ملک میں ٹیکنیکل لوگوں کی کمی ہے اور اب ہم نے 21 ویں صدی کے پیش نظر اپنے نوجوانوں کو تیار کرنا ہے۔

انہوں نے اپنے خطاب میں کہا ہے کہ چیمبرز کامیاب جوان پروگرام کے لئے ڈیسک قائم کریں اور حکومت اس ضمن میں وسائل و معاونت فراہم کرے گی کیونکہ کامیاب جوان پروگرام کا تعلق کسی جماعت سے نہیں بلکہ میرٹ صرف ہنرمند ہونا ہے۔

ان کا کہنا تھا کہ پیسہ اس نوجوان تک پہنچنا چاہیئے جو ٹیکس کے اس پیسے کو سنبھال سکے اور اسے بہتر انداز میں استعمال کرسکے

کامیاب جوان پروگرام کی رقوم پر سود ادا نہ کرنے والوں کے لئے اس سکیم میں اسلامی بینکس بھی شامل کرلیئے گئے ہیں۔

ان کا کہنا تھا کہ تاجروں کی مطالبات کے پیش نظر تمام مسائل حل کرنے کی یقین دہانی کراتا ہوں کیونکہ کورونا کے بعد ساری دنیا انڈسٹری کی بحالی کے پروگرام تیار کر رہی ہے۔